काठमाण्डौँ- नेपाली कांग्रेसका उपसभापति विश्वप्रकाश शर्माले रामेछाप जिल्लाको भौतिक पूर्वाधार, शिक्षा, स्वास्थ्य र सञ्चार क्षेत्रमा भएको विकासमा नेपाली कांग्रेसको ऐतिहासिक भूमिका रहेको बताएका छन् ।
नेपाली कांग्रेस रामेछापका भातृ तथा शुभेच्छुक संस्थाहरूले बिहीबार काठमाण्डौँमा आयोजना गरेको बृहत् चुनावी भेला तथा चियापान कार्यक्रममा बोल्दै उपसभापति शर्माले पञ्चायतकालमा केन्द्रसँग नजोडिएको रामेछाप बहुदल आएपछि कांग्रेसकै नेतृत्वमा सडक, पुल, विद्युत् र सञ्चार सेवासँग जोडिएको बताए ।
“खुर्कोटको पुलदेखि मन्थली–रस्नालु हुँदै कुपुकास्थली जाने बाटोसम्म, ओखलढुङ्गा जोड्ने पुराना सदरमुकामका सडकसम्म कांग्रेस कहीँ न कहीँ जोडिएको छ,” उनले भने, “पहिले सदरमुकाम वा काठमाडौँ आएर पढ्नुपर्ने अवस्था थियो, आज गाउँमै प्लस टु पढ्न पाइरहेको छ, त्यसमा पनि कांग्रेसको भूमिका छ ।”
उनले विगतमा भएका कमजोरीहरू स्वीकार गर्दै कांग्रेसले आत्मसमीक्षा गरेको पनि बताए । “हामीले गर्न नसकेका काम, ढिला भएका आयोजना, गुणस्तरहीन सडक, समयमा नसकिएका परियोजनाका कारण नागरिक हामीसँग रिसाएका छन्,” शर्माले भने, “त्यसैले भदौ २३ र २४ पछि पार्टीले गम्भीर आत्मसमीक्षा गर्यो, हामीले माफी पनि माग्यौँ ।”
शर्माले कांग्रेसको अहिलेको मूल एजेन्डा सद्भाव, सुशासन र समुन्नति भएको उल्लेख गर्दै समाजमा सबैभन्दा पहिला सद्भाव आवश्यक रहेको बताए । “जित–हार चलिरहन्छ, तर समाज जोडिनुपर्छ,” उनले भने ।
कार्यक्रममा शर्माले रामेछापबाट कांग्रेसका उम्मेदवार रामचन्द्र खड्काको खुलेर प्रशंसा गरे । “दाग नलागेको, नैतिकता र आदर्शमा उभिएको व्यक्तित्वका रूपमा रामचन्द्र दाइलाई हामी श्रद्धा गर्छौँ,” उनले भने, “उहाँ संसदमा पुग्दा केवल सांसद होइन, रामेछापका अभिभावकका रूपमा उभिनुहुनेछ ।”
उनले रामेछापका मतदातालाई रूख चिन्हमा मतदान गर्दै कांग्रेसको भावी नेतृत्वलाई पनि समर्थन गर्न आग्रह गरे । “रूख चिन्हमा परेको मत केवल उम्मेदवारका लागि मात्र होइन, देशको प्रधानमन्त्री बन्ने नेतृत्वका लागि पनि हो,” शर्माले भने, गगन थापाको नेतृत्वप्रति भरोसा गर्न कार्यकर्तालाई आग्रह गरे ।
कार्यकर्तालाई लक्षित गर्दै उनले निर्वाचन परिचालनमा काठमाडौँमा बस्नुभन्दा गाउँ–गाउँमा खटिन निर्देशन दिए । “जसको जिम्मेवारी जहाँ, उसले खट्ने त्यहीँ,” उनले भने, “फागुन २१ सम्मका ३० दिन जमिनमै जानुस्, आफ्नो वडा, आफ्नो टोल, आफ्नो गाउँमा काम गर्नुस् ।”
शर्माले रामचन्द्र खड्काले यसपटक सांसद भएर जितेपछि नेतृत्व नयाँ पुस्तालाई सुम्पिने प्रतिबद्धता व्यक्त गरिसकेको उल्लेख गर्दै स्थानीय तहको आगामी निर्वाचनलाई ध्यानमा राखेर अहिलेबाटै तयारी गर्न कार्यकर्तालाई आग्रह गरे । “वडाध्यक्ष, मेयर, पालिकाका नेतृत्वका लागि आजैदेखि गाउँमा मुभ गर्नुभयो भने भोलि जित सम्भव हुन्छ,” उनले भने ।
उनले सबैलाई एकजुट भएर चुनावी अभियानमा लाग्न आग्रह गर्दै भने, “फागुन २१ पछि रामेछापले हजारौँ मतले कांग्रेसका उम्मेदवारलाई विजयी गरायो भन्ने सन्देश देशभर जानेछ, त्यो काम तपाईंहरूले गरेर देखाउनुहुन्छ भन्नेमा म विश्वस्त छु ।”
