रामेछाप- नेपाल सुनचाँदी कला व्यवसायी संघ रामेछापले आगामी आर्थिक वर्ष २०८२/८३ को बजेटमा सुनचाँदी तथा हिरा-पत्थरका गहनामा गरिएको नयाँ कर संरचनाप्रति गम्भीर आपत्ति जनाउँदै बिहीबार प्रमुख जिल्ला अधिकारी मार्फत सरकारको ध्यानाकर्षण गराएको छ । संघका सचिव सिताराम लोहारले हस्ताक्षर गरेको ज्ञापनपत्र बिहिबार रामेछापका प्रमुख जिल्ला अधिकारी श्यामकृष्ण थापा मार्फत बुझाउदै संघले सरकारको ध्यानाकर्षण गराएको हो ।
ज्ञापनपत्रमा सुनचाँदी व्यवसायमाथि लगाइएको विलासिता कर र मूल्य अभिवृद्धि कर तत्काल खारेज गर्न माग गरिएको छ । बिहीबार बिहानैदेखि जिल्लाभरका करिब ६० सुनचाँदी पसल बन्द गराउँदै व्यवसायीहरू आन्दोलित बनेका छन् ।
ज्ञापनपत्रमा लेखिएको छ, “अघिल्लो वर्ष १० लाख रुपैयाँभन्दा माथिका गहनामा मात्र लाग्दै आएको २ प्रतिशत विलासिता कर आगामी आर्थिक वर्षदेखि सीमा नतोकी सम्पूर्ण गहनामा लागू गरिएको, हिरा तथा बहुमूल्य पत्थर जडित गहनामा १३ प्रतिशत भ्याट थप गरिएको, कर वृद्धिले बजारमा ८ हजार रुपैयाँसम्म मूल्य अन्तर आउने भएकाले भारतीय बजारभन्दा नेपाली बजार प्रतिकूल असर पर्ने यस्तो कार्यले गर्दा तस्करी र अवैध कारोबार बढ्न सक्नेछ ।”
सुनचाँदी व्यवसायीले सरकारसँग चारबुँदे मागसहित करको पुनर्विचार गर्न माग राखेका छन् । उनिहरुले सम्पूर्ण गहनामा लागू गरिएको विलासिता कर र हिरा-पत्थर जडित गहनामा लागू गरिएको भ्याट तत्काल खारेज गर्नुपर्ने, दीर्घकालीन नीति निर्माण गर्दै ऐन, नियम र कानुन तयार गर्नुपर्ने, कर संरचना परिवर्तन गर्नु पूर्व प्रभावको विस्तृत अध्ययन गर्नुपर्ने र निर्यात ढुवानीमा लाग्ने २.५ प्रतिशत टिडिएस खारेज गर्नु पर्ने माग राखेका छन् । विहिबार बन्दा भएका रामेछापका सबै सुनचाँदी पसल शुक्रबार पनि बन्द गरिने सचिव लोहारले बताए ।
सुनको मूल्य वृद्धि र बजारको मन्दी अवस्थाबीच नयाँ कर संरचनाले व्यवसायी, कालीगढ र मजदुरहरूको जीविकोपार्जन नै संकटमा पार्ने अवस्था सिर्जना हुने नेपाल सुनचाँदी कला व्यवसायी महासंघका निवर्तमान केन्द्रीय सदस्य आकश रिजालले बताए ।
