रामेछाप- रामेछापको लिखुतामाकोशी गाउँपालिकामा गएको वर्ष देखि संचालनमा आएको ‘डिजिटल प्राथमिक स्वास्थ्य सेवा’ बाट ८ सय भन्दा बढी नागरिकले सेवा लिएका छन् । गएको वर्ष देखि गणेश उज्जन (भुवन) स्मृति प्रतिष्ठान र एनपीओ आशा जापानको सहकार्यमा संचालन भएको ‘डिजिटल प्राथमिक स्वास्थ्य सेवा’ बाट गाउँपालिका भित्रका ८ सय भन्दा बढीले सेवा लिएका हुन् ।
एक वर्षको प्रगति प्रतिवेदन प्रस्तुत गर्दै संस्थाले एक वर्षमा ‘डिजिटल प्राथमिक स्वास्थ्य सेवा’ मार्फत ३ सय २४ जनाले मातृ तथा शिशु स्वास्थ्य सम्बन्धी समस्याहरू दर्ता गराएका र उनीहरूलाई विभिन्न चरणमा ६ सय ५१ पटक सेवा दिइएको बताएको छ । त्यस्तै ४ सय ९३ जना दीर्घरोगीहरू आफ्नो समस्या सहित दर्ता गराएका (मधुमेह, उच्च रक्तचाप, दम) र दर्ता मध्ये ७ सय ३१ पटक सेवा दिइएको संस्थाले आफ्नो प्रगति विवरणमा प्रस्तुत गरेको छ । त्यसै गरी वार्षिक प्रगति प्रतिवेदनमा प्राथमिक उपचार तालिमलाई सरल र उपयोगी बनाउँदै १५ विद्यालयका ३ सय ५ जना विद्यार्थीहरूलाई प्रशिक्षण प्रदान गरिएको उल्लेख छ ।
कार्यक्रममा बोल्दै लिखुतामाकोशी गाउँपालिकाका अध्यक्ष केशव महतले गाउँपालिकाको ‘स्वस्थ नागरिक बनाउने’ अभियानमा गणेश उज्जन (भुवन) स्मृति प्रतिष्ठान र एनपीओ आशा जापानको सहकार्यमा ‘डिजिटल प्राथमिक स्वास्थ्य सेवा’ मार्फत नागरिकलाई दिइएको सेवा धेरै प्रभावकारी भएको बताउँदै उक्त कार्यको लागि गाउँपालिकाले पूर्ण रूपमा सहयोग गर्ने प्रतिबद्धता जनाए । अध्यक्ष महतले स्वास्थ्य जस्तो संवेदनशील कार्यमा सहयोग गर्ने प्रतिष्ठानसँग मिलेर अन्य काम पनि गर्न सकिने धारणा व्यक्त गरे ।
प्रतिष्ठानकी अध्यक्ष सावित्री श्रेष्ठको अध्यक्षतामा भएको कार्यक्रममा वडा नम्बर १ देखि ७ सम्मका वडाध्यक्षहरू, पालिकाका १५ विद्यालयका प्रधानाध्यापकहरू र स्वास्थ्य इन्चार्जहरू सहभागी रहेका थिए । कार्यक्रममा एनपीओ आशा जापानका अध्यक्ष योशिफुमी निनले यो कार्यक्रमले डिजिटल प्रविधिमार्फत स्वास्थ्य सेवामा ल्याएको सकारात्मक प्रभावबारे आफ्नो विचार राख्दै ग्रामीण क्षेत्रका नागरिकले सहज रूपमा सेवा पाउनु ठुलो उपलब्धि भएको धारणा व्यक्त गरे ।
सल्लाहकार राजकुमार श्रेष्ठले शिक्षा, स्वास्थ्य, र सामाजिक विकासमा प्रतिष्ठानको भूमिकालाई महत्त्वपूर्ण बताउँदै समुदायको स्वास्थ्य सुधारका लागि यस कार्यक्रमको आवश्यकता र महत्वलाई प्रस्तुत गरेका थिए ।
गएको वर्ष देखि संचालन भएको कार्यक्रम गाउँपालिकामा निरन्तर रूपमा संचालन हुने कार्यक्रमका परियोजना संयोजक गणेशमान लामाले बताए ।
कार्यक्रममा उत्कृष्ट योगदान गर्ने समुदाय स्वास्थ्य कार्यकर्ता वर्ष २०२४ पुरस्कार लालमाया तामाङ वडा नंं ५, समुदाय प्रभाव पुरस्कार सस्मिता माझी वडा नं ६ र नेतृत्व पुरस्कार उर्मिला पौडेल वडा नं २ लाई प्रदान गरिएको प्रतिष्ठानका सचिव रामहरि केसीले बताए ।
केसीका अनुसार आगामी वर्ष देखि प्रतिष्ठानकै सहयोगमा जेष्ठ नागरिक हेरचाह सेवा सुरु गरी जेष्ठ नागरिकको स्वास्थ्यमा विशेष ध्यान दिने र उनीहरूको जीवनस्तर सुधारमा काम गर्ने योजना रहेको छ ।
