रामेछाप- जिल्लामै पहिलो पटक स्थापना भएको संस्थागत विद्यालय लिट्टिल स्टार इङ्ग्लिस स्कुल, मन्थलीले यस वर्षको एसइई परीक्षामा उत्कृष्ट नतिजा हासिल गरेको छ । राष्ट्रिय परीक्षा बोर्डले सोमबार राति सार्वजनिक गरेको नतिजाअनुसार विद्यालयबाट परीक्षामा सहभागी सबै २० जना विद्यार्थी सतप्रतिशत ग्रेडेड भएका हुन् ।
विद्यालयका प्रिन्सिपल रमेश फुयालका अनुसार सहभागी विद्यार्थीमध्ये ५ जना अर्थात् २५ प्रतिशतले ४ जिपिए प्राप्त गरेका छन् । उत्कृष्ट नतिजासँगै विद्यालयले विगतदेखि कायम राख्दै आएको शैक्षिक उत्कृष्टतालाई यस वर्ष पनि निरन्तरता दिएको जनाएको छ ।
३० वर्षअघि रामेछापको सदरमुकाम मन्थलीमा स्थापना भएको लिट्टिल स्टार इङ्ग्लिस स्कुलले जिल्लाको शैक्षिक क्षेत्रमा महत्वपूर्ण योगदान दिँदै आएको छ । प्रिन्सिपल फुयालले उत्कृष्ट नतिजा ल्याउने सम्पूर्ण विद्यार्थीलाई बधाई दिँदै विद्यालयले निरन्तर हासिल गर्दै आएको सफलतालाई यस वर्ष पनि कायम राख्न सफल भएकोमा खुसी व्यक्त गरे । उनले विद्यालयबाट एसएलसी तथा एसइई परीक्षा दिने १९औँ ब्याचसम्म आइपुग्दा हरेक वर्षको नतिजाले विद्यालय परिवारलाई उत्साहित बनाउनुका साथै विद्यार्थीहरूको उज्ज्वल भविष्य निर्माणमा समेत महत्वपूर्ण योगदान पुर्याएको बताए ।
विद्यालयले आगामी दिनमा पनि गुणस्तरीय शिक्षा, अनुशासन र आधुनिक शिक्षण पद्धतिलाई थप प्रभावकारी बनाउँदै लैजाने प्रतिबद्धता जनाएको छ ।
