रामेछाप- विश्व वातावरण दिवसको अवसर पारेर रामेछाप जेसिजले वृक्षारोपण कार्यक्रम सम्पन्न गरेको छ । वातावरण संरक्षण, हरियाली प्रवर्द्धन तथा जलवायु परिवर्तनका असर न्यूनीकरण गर्ने उद्देश्यले मन्थली नगरपालिका–३ ठुलीमदौ क्षेत्रमा विभिन्न जातका बिरुवा रोपेर दिवस मनाइएको हो ।
नेपाल जेसिजको ‘प्रकृति जगाऔँ अभियान’ अन्तर्गत आयोजित कार्यक्रममा रामेछाप जेसिजका पदाधिकारी, सदस्य तथा स्थानीय युवाहरूको सहभागिता रहेको थियो । कार्यक्रममा फलफूल तथा वनजन्य प्रजातिका विभिन्न बिरुवा रोपिएको जेसिजले जनाएको छ ।
रामेछाप जेसिज वर्ष २०२६ का अध्यक्ष कुमार श्रेष्ठले वातावरण संरक्षण अहिलेको प्रमुख आवश्यकता भएको बताउँदै वृक्षारोपण जस्ता कार्यक्रमले प्रकृतिप्रति नागरिकको जिम्मेवारीबोध बढाउन सहयोग पुग्ने बताए । उनले वन विनाश, जलवायु परिवर्तन र वातावरणीय प्रदूषणका चुनौती बढ्दै गइरहेका बेला वृक्षारोपणलाई अभियानकै रूपमा अघि बढाउन आवश्यक रहेको उल्लेख गरे ।
उनले प्रत्येक व्यक्तिले कम्तीमा एक बिरुवा रोप्ने र त्यसको संरक्षण गर्ने संस्कार विकास गर्न सके वातावरण संरक्षणमा महत्वपूर्ण योगदान पुग्ने विश्वास व्यक्त गरे । रोपिएका बिरुवाको नियमित हेरचाह तथा संरक्षणका लागि पनि जेसिजले विशेष ध्यान दिने जनाएको छ ।
रामेछाप जेसिजले सामाजिक उत्तरदायित्व अन्तर्गत शिक्षा, स्वास्थ्य, नेतृत्व विकास, सरसफाइ, वातावरण संरक्षण तथा जनचेतनामूलक कार्यक्रमहरू सञ्चालन गर्दै आएको छ । विभिन्न राष्ट्रिय तथा अन्तर्राष्ट्रिय दिवसका अवसरमा समुदायसँग प्रत्यक्ष सरोकार राख्ने कार्यक्रम आयोजना गर्दै आएको जेसिजले आगामी दिनमा पनि वातावरण संरक्षण सम्बन्धी अभियानलाई निरन्तरता दिने जनाएको छ ।
