रामेछाप- रामेछापको सदरमुकाम मन्थलीमा रहेको लिट्टिल स्टार अंग्रेजी स्कुलबाट २०८० सालमा एसइई परीक्षामा सामेल हुने विद्यार्थीहरुलाई सफलताका कामना सहित विद्यालयले बिदाइ गरेको छ । शुक्रवार विद्यालयमा बिदाइ तथा परीक्षा सफलताको शुभकामना सहित विद्यालयले विद्यार्थीहरूलाई बिदाइ गरेको हो ।
२०५२ सालमा स्थापना भएको लिट्टिल स्टार अंग्रेजी स्कुलले २०६३ सालबाट तत्कालीन एस.एल.सी परीक्षामा सामेल हुन थालेकाे हाे भने शुक्रवार बिदाइ गरिएका विद्यार्थीहरु १७ औँ ब्याचका हुन् ।
कार्यक्रमका प्रमुख अतिथि समेत रहेका नेपाल पत्रकार महासंघका अध्यक्ष बद्री नयाँघरेले विद्यार्थिहरुलाई उत्कृष्ट नतिजा ल्याउने गरी एसइई परीक्षामा सामेल हुन आग्रह गरे । उनले जिल्लामा पुरानो निजी विद्यालयको रूपमा आफ्नो विशिष्ट योगदान गरेको लिट्टिल स्टार अंग्रेजी स्कुलका लागि आगामी दिन पनि उत्कृष्ट हुँदै जाने बताए ।
बिदाइ तथा परीक्षा सफलताको शुभकामना कार्यक्रमका अध्यक्ष समेत रहेको विद्यालयका प्रधानाध्यापक रमेश फुयालले विद्यार्थीहरूलाई परीक्षा सफलताको शुभकामना दिँदै परीक्षामा राम्रो नतिजा ल्याउने गरी तयारी गर्न आग्रह गरे । उनले लिट्टिल स्टार अंग्रेजी विद्यालयबाट यस अघि अध्ययन सकेका विद्यार्थीहरू देशको लागि दक्ष जनशक्ति भइसकेको स्मरण गराउँदै चैत्र १५ गतेबाट हुने एसइई परीक्षामा सहभागी हुने विद्यार्थीलाई देशको राम्रो र दक्ष जनशक्ति बन्छु भन्ने लक्ष्यका साथ अगाडि बढ्न सुझाव दिए ।
कार्यक्रममा सहभागी अभिभावकहरूले लिट्टिल स्कुलले माध्यमिक तह सम्मको शिक्षा राम्रो दिएको भन्दै धन्यवाद दिएका थिए ।
चैत्र १५ गतेबाट एसइई परीक्षामा सामेल हुने विद्यार्थीहरूले कक्षा १० सम्म अध्ययन गरेको विद्यालयलाई सधैँ स्मरण गरिरहने बताए । विद्यार्थीहरूले आफ्नो उच्च शिक्षा अध्ययनको प्रवेश विन्दु नै एसइई भएको बताउँदै एसइई परीक्षामा राम्रो नतिजा आउनेमा आफूहरू विश्वस्त रहेको दाबी गरे ।
कार्यक्रममा सामाजिक अभियन्ता सुन्दर घिमिरे, विद्यालयका सहायक प्रधानाध्यापक हस्त बहादुर लामा, पूर्व विद्यार्थी एवं राष्ट्रिय युवा परिषद्को जिल्ला प्रतिनिधि एलिना कार्की, शिक्षक तीर्थराज बराल, अमर रम्तेल लगायतले विद्यार्थीहरूलाई शुभकामना दिएका थिए ।
सोही कार्यक्रमको अवसरमा लिट्टिल स्टार अंग्रेजी स्कुलबाट साधारण धार तर्फ एसइइमा रामेछाप जिल्लाकै सबै भन्दा बढी उत्कृष्ट अंक ल्याउने ग्रिष्मा कार्कीलाई सम्मान गर्दै उनको अभिभावक गोम कार्कीलाई समेत दोसल्ला ओढाएर सम्मान गरिएको थियो । कार्यक्रममा विद्यार्थी र शिक्षकहरू सामूहिक साङ्गीतिक प्रस्तुति समेत गरेका थिए ।
