रामेछाप– दीप बहादुर कार्की स्मृति प्रतिष्ठानले विभिन्न विद्यालयका विद्यार्थीलाई न्यानो कपडा, खाजाको लागि पैसा, इन्टरनेट शुल्क र विद्यालयको पुस्तकालयलाई विभिन्न पुस्तक सहयोग गरेको छ । रामेछाप नगरपालिकाको वडा नं ७ सुकाजोरमा रहेको प्रतिष्ठानले सोही वडामा रहेका २ विद्यालयमा अध्ययनरत विद्यार्थी र रामेछाप नगरपालिका वडा नं ८ मा रहेको अर्को विद्यालयको पुस्तकालयलाई विभिन्न पुस्तक सहयोग गरेको हो ।
रामेछापको वडा नं ७ सुकाजोरमा रहेको सेतीदेवी आधारभूत विद्यालय सिम्लेका २६ जना र सुकाजोरकै सिद्धेश्वर आधारभूत विद्यालयका २६ जना विद्यार्थीलाई न्यानो कपडा र जुत्ता–मोजा सहयोग गरिएको प्रतिष्ठानका अध्यक्ष कमल विक्रम कार्कीले बताए । त्यस्तै रामेछाप नगरपालिका वडा नं ८ मा रहेको गौरीशंकर माविमा रहेको पुस्तकालयलाई विद्यालयकै माग अनुसारका १ लाख ५० हजार बराबरका पुस्तकहरू उपलब्ध गराइएको पनि अध्यक्ष कार्की बताए ।
प्रतिष्ठानकै सहयोगमा सुकाजोरको गैयाश्वरी आधारभूत विद्यालयका विद्यार्थीलाई विद्यालय पोसाक, झोला, शैक्षिक सामाग्री, विद्यालयलाई आवश्यक पर्ने प्रोजेक्टर, कम्प्युटर, फर्निचर, इन्टरनेट शुल्क, विद्यार्थीका लागि प्रति विद्यार्थी १५ रुपैयाँका दरले दिवा खाजाको गागि पैसा दुई वर्ष देखि नियमित दिँदै आएको र यो वर्ष पनि दिइएको अध्यक्ष कार्कीले बताए । त्यस्तै अध्यक्ष कार्कीका अनुसार शिद्धेश्वर आविलाई गएको वर्ष देखि दिँदै आएको दिवा खाजाको प्रति विद्यार्थी १५ रुपैयाँका दरले यो वर्ष पनि दिइएको छ ।
गौरीशंकर माविमा अध्ययन गर्ने ३ जना छात्रा छात्रलाई प्रतिष्ठानले नै कक्षा ४ देखि १२ कक्षा सम्ममा शैक्षिक सामाग्री, विद्यालय पोषक र विभिन्न शीर्षकमा लाग्ने शुल्क समेत तिरिदिने व्यवस्था मिलाइएको अध्यक्ष कार्कीले बताए ।
आइतबार सम्बन्धित विद्यालयमै पुगेर रामेछाप नगरपालिकाका प्रमुख लबश्री न्यौपानेको प्रमुख आतिथ्ययतामा सामाग्री वितरण गरिएको हो । कार्यक्रममा बोल्दै नगर प्रमुख न्यौपानेले पोसाक तथा पुस्तक हस्तान्तरणले बालबालिकाको शैक्षिक प्रगतिमा ठुलो सहयोग पुग्ने धारणा राखे ।
कार्यक्रममा रामेछाप नगरपालिका वडा नं ७ सुकाजोरका वडाध्यष्क समिर कार्की, प्रतिष्ठानका उपाध्यक्ष नारायण कार्की, सदस्य सुदिप कार्की लगायत विद्यालय व्यवस्थापन समितिका अध्यक्ष लगायतको सहभागिता रहेको थिय ।
