रामेछाप– नेपाली काँग्रेसका नेता प्रकाशमान सिंहले पार्टीको भातृ सङ्गठन र शुभेच्छुक संस्थाहरू निष्क्रिय हुँदा पार्टी कमजोर हुँदै गएको बताएका छन् । मङ्गलवार रामेछापमा पार्टीका नेता तथा कार्यकर्तासँगको भेटघाटको क्रममा आफ्नो भनाइ राख्दै नेता सिंहले पछिल्लो समयमा पार्टीका भातृ सङ्गठन र शुभेच्छुक संस्थाहरूको अधिवेशन नहुँदा ती संस्थाहरूको निष्क्रियताले गर्दा मूल पार्टी कमजोर हुँदै गएको बताएका हुन् ।
नेता सिंहले पार्टीको महाधिवेशन समयमै गर्नु पर्ने, भातृ सङ्गठनहरूलाई सक्रिय बनाउनु पर्ने, समय अवधि सकिएका सङ्गठन र शुभेच्छुक संस्थाको अधिवेशन समयमै गराउनु पर्नेमा पार्टीको केन्द्रीय समिति देखि तल्लो तहको वडा समिति सम्मका संरचना सबै एक भएर लाग्नु पर्ने धारणा राखे । काँग्रेसका युवा सङ्गठनहरूको अधिवेशन पटक पटक म्याद थप गर्दा पनि अधिवेशन हुन नसक्दा पार्टी भित्रका युवाहरूले राजनीतिमा अन्य विकल्पहरू खोज्न थालेकाले अब काँग्रेसले त्यस्ता युवाहरूलाई आफ्नै पार्टी भित्र राख्ने गरी सङ्गठनहरूलाई सक्रिय बनाउनु पर्नेमा जोड दिए ।
पार्टीका एजेन्डा, बिचार, आगामी कार्यक्रम र जनताका समस्या पहिचान गरेर समाधान गर्ने योजना सहित नयाँ तरिकाबाट जनताको माझमा नगए पार्टीलाई थप क्षति हुने भनाई राख्दै पार्टीको क्षतिलाई रोक्ने गरी पार्टीका सबै तहका समितिलाई जनता माझमा पुग्न आग्रह गरे । पार्टीका हरेक गतिविधिलाई नयाँ तरिकाबाट अहिलेको प्रविधिलाई प्रयोग गर्दै जनता माझमा लैजानु पर्नेमा नेता सिंहको जोड रहेको छ ।
प्रतिनिधि सभा सदस्य समेत रहेका नेता सिंहले काँग्रेसकै नेतृत्वमा बनेको संविधानलाई पूर्ण रूपमा कार्यान्वयन गर्न नसक्दा सङ्घीयता माथि नै प्रश्न उठेको बताए । अधिकार सम्पन्न स्थानीय सरकार र प्रदेश सरकारलाई आवश्यक पर्ने कानुनहरू बन्न नसकेको कारणले गर्दा अहिले तीन तहका सरकारहरूले काम गर्न नसको धारणा राख्दै सङ्घीय सकारले बनाउनु पर्ने कानुनहरू बनाएर अहिलेको समस्या सधान गर्नमा काँग्रेस सरकार लाग्नु पर्नेमा उनको जोड रहेको थियो ।
नेपाली काँग्रेस रामेछापको पार्टी कार्यालय भैसेश्वरमा भएको नेता तथा कार्यकर्ता भेटघाटमा आफ्नो भनाई राख्दै पूर्व राष्ट्रिय सभा सदस्य एवं काँग्रेस नेता राधेश्याम अधिकारीले हाल नेपालमा देखिएको राजीनितक अवस्थाको बारेमा सबै पार्टीले संवेदनशील भएर अगाडि बढ्नु पर्ने अवस्था आएको बताए ।
कार्यक्रममा नेपाली काँग्रेस रामेछापका उपसभापति लेख बहादुर कार्की, निवर्तमान पार्टी सभापति लवश्री न्यौपाने र पार्टी सचिव दीपक खड्काले पार्टी भित्र देखिएका समस्यामा पार्टीको केन्द्रीय समिति बढी जिम्मेवार भएर समाधानमा लाग्नु पर्नेमा जोड दिएका थिए ।
