रामेछाप- भवन निर्माण गर्ने जिम्मा लिएको निर्माण कम्पनीले सम्झौता समयावधि भित्रै काम सम्पन्न गरेपछि कम्पनीका संचालक संम्मानित भएका छन् । जिल्ला प्रहरी कार्यालय रामेछाप परिसर भित्र कार्यालय प्रमुख र सिनियर प्रहरी अधिकृत आवास भवन निर्माणको जिम्मा लिएको थापा निर्माण सेवा प्रा.लि.का संचालक दिपक कुमार थापाले समयावधि भित्रै काम सम्पन्न गरेको भन्दै जिल्ला प्रहरी कार्यालय रामेछापले प्रशंसा पत्र दिएर थापालाई सम्मान गरेको हो ।
गएको कार्तिक महिनामा नै निर्माण सम्पन्न गरेर भवन बुझाएका थापालाई भवन उद्घाटनको अवसर पारेर सोमबार बागमती प्रदेश प्रहरी प्रमुख प्रहरी नायव महानिरीक्षक किरण बज्राचार्यले प्रशंसा–पत्र प्रदान गर्दै सम्मान गरेकी हुन् । प्रहरी प्रमुख बज्राचार्यले अधिकासं ठाउँहरुमा निर्माणको जिम्मा लिएर समयावधि भित्रै काम नगर्ने निर्माण व्यवसायीलाई आफूहरुले नै कारवाहीका लागि प्रक्रिया अगाडि बढाउनु परेको स्मरण गर्दै रामेछापमा आफ्नै संगठनको भवन निर्माण गर्ने जिम्मा लिएर समयावधि भित्रै निर्माण सक्ने व्यक्तिलाई सम्मान गर्न पाउँदा खुसी लागेको बताइन् ।
त्यस्तै प्रमुख जिल्ला अधिकारी शोभाखर रेग्मीले समयमै काम सम्पन्न गर्ने निर्माण व्यवसायीलाई धन्यबाद सहित प्रशंसा पत्र प्रदन गरेको देख्दा समयमै काम सम्पन्न गर्ने निर्माण व्यवसायी पनि हुने रहेछन् भन्ने उदहारणको एक व्यक्ति दिपक थापा बनेको बताए । प्रजिअ रेग्मीले जिल्लामा निर्माणको जिम्मा लिएर समयावधिमै काम सम्पन्न नगरी अलपत्र पारेर हिड्ने निर्माण व्यवसायीलाई पनि सम्मानित हुने गरी काम गर्न आग्रह गरेका छन् ।
यस अघि पनि अधिकासं काम सम्झौता अवधि भित्रै सम्पन्न गरेर विभिन्न ठाउँबाट सम्मानित भएका निर्माण व्यवसायी दिपक थापाले आफू सम्मानित भएकोमा भन्दा पनि आफूले जिम्मा लिएको काम समयावधि भित्रै सम्पन्न गर्न पाउँदा त्यसले आफूलाई खुसी बनाएको प्रतिक्रिया दिए । सम्झौता समयावधि भित्रै काम सम्पन्न गर्दा कम लागतमै काम सम्पन्न हुनुको साथै निर्माण कम्पनी र सरकारलाई समेत फाइदा पुग्ने उनले बताए ।
निर्माण कम्पनीले समयावधि भित्रै काम सम्पन्न गरेर समयमै बुझाउन सके पछिल्लो समय निर्माण क्षेत्रमा देखिएको समस्या समधान हुनुको साथै निर्माण व्यवसायीलाई सरोकारवाला निकायले हेर्ने दृष्टिकोण समेत सकरात्मक हुने थापाको भनाइ रहेको छ ।
३ करोड ७ लाख ५४ हजार ८ सय रुपैयाँको लागतमा निर्माण गरेर २०७९ कार्तिक भित्र सम्पन्न गर्ने गरी मिति २०७८ असार ३ गते सम्झौता भएको थियो ।
