रामेछाप– मन्थली नगरपालिकाले ३२ औँ अन्तराष्ट्रिय जेष्ठ नागरिक दिवसको पुर्व सन्ध्यामा जेष्ठ नागरिकहरुको स्वास्थ्य परीक्षण तथा बुढ्यौली अवस्थामा लाग्ने रोगहरु र रोग व्यवस्थापन सम्बन्धी परामर्श कार्यक्रमको आयोजना गरेको छ । असोज १५ गते ३२ औं अन्तराष्ट्रिय जेष्ठ नागरिक दिवस भएको र उक्त दिवसको पुर्व सन्ध्यामा विहिबार मन्थली नगरपालिका वडा नं ३ कठजोरमा कार्यक्रमको आयोजना गरेर त्यहाँ रहेका जेष्ठ नागरिकहरुको स्वास्थ्य परीक्षण तथा बुढ्यौली अवस्थामा लाग्ने रोगहरुको व्यवस्थापन सम्बन्धी परामर्श कार्यक्रमको आयोजना गरिएको हो ।
वडा कार्यालयको समन्वय तथा नगरपालिकाको आयोजनामा भएको स्वास्थ्य परीक्षणमा १ सय ५४ जना जेष्ठ नागरिकको स्वास्थ्य परीक्षण गरिएको छ भने कार्यक्रममा सहभागी भएका जेष्ठ नागरिकहरुलाई बुढ्यौली अवस्थामा लाग्ने रोग र त्यस्ता रोग व्यवस्थापनको बारेमा परामर्श गरिएको स्वास्थ्य परीक्षण टोलीका डा. केशव सिंह धामीले जानकारी । स्वास्थ्य परीक्षणमा सहभागि भएका अधिकासं जेष्ठ नागरिकहरुमा घुँडा दुख्ने , दम, ग्यास्ट्रिक लगायतका समस्याहरु देखिएको डा. धामीले बताए । डा. धामीका अनुसार स्वास्थ्य परीक्षण गर्दा विभिन्न रोग देखिएका जेष्ठ नागरिकलाई नगरपालिकाले निःशुल्क उपलब्ध गराएको औषधि वितरण गरिएको र बाँकी अन्य समस्या भएका विरामीहरुलाई उपचारको लागि मन्थली अस्पातलमा सम्पर्क गर्न समेत अनुरोध गरिएको छ । डा. धामी मन्थली अस्पतालमा कार्यरत छन् ।
जेष्ठ नागरिक समाजका सम्पत्ति हुन्– नगर प्रमुख श्रेष्ठ
मन्थली नगरपालिकाका नगर प्रमुख लव श्रेष्ठले जेष्ठ नागरिक हाम्रो समाजका महत्वपूर्ण सम्पत्ति भएको बताएका छन् । जेष्ठ नागरिकहरुको स्वास्थ्य परीक्षण कार्यक्रममा बोल्दै नगर प्रमुख श्रेष्ठले जेष्ठ नागरिकहरु हाम्रो समाजको ऐतिहासिक र महत्वपूर्ण सम्पत्ति भएको बताएका हुन् । राज्यले ७० वर्ष पुरा भएका जेष्ठ नागरिकलाई सामाजिक सुरक्षा भत्ता उपलब्ध गरेर उहाँहरको समस्या समधान गर्ने काम गरीरहेको धारणा राखे । उनले नगर भित्रका ६८ देखि ७० वर्ष उमेर समूहका जेष्ठ नागरिकहरुले स्वास्थ्य बीमा नगरेको भए नगरले ५० प्रतिशत रकम तिरेर बीमा गरिदिने कार्यक्रम ल्याएको हुँदा बीमा नगरेका नागरिकलाई वडा वा नगरमा सम्पर्क गर्न समेत अनुरोध गरे । उनले जेष्ठ नागरिकहरुको सम्मान तथा उनिहरुको विभिन्न समस्या समधान गर्न नगरपालिकाले जेष्ठ नागरिक क्लब गठन गर्ने नीति बनाएकाले चाँडै क्लब गठन गरेर काम थालिने बताए । जेष्ठ नागरिकका समस्या हामी सबैका साझा समस्या भएकाले त्यस्ता समस्या भएका जेष्ठ नागरिकहरुलाई सबैले सहयोग गर्नु पर्ने मानव समुदायको दायित्व रहेको पनि नगर प्रमुखले बताए ।
कार्यक्रममा मन्थली नगरपालिका उप–प्रमुख ईश्वरी बस्नेत, मन्थली नगरपालिका वडा नम्बर ८ चिसापानीका अध्यक्ष गोपाल श्रेष्ठ, जिल्ला जेष्ठ नागरिक संघ रामेछापका अध्यक्ष नारायण दास श्रेष्ठ र सामाजिक अभियान्ता यम बहादुर थापाले आफ्नो मन्तब्य राखेका थिए । कार्यक्रममा मन्थली नगरपालिका योजना शाखाका प्रमुख उज्वल पोखरेल, मन्थली नगरपालिका वडा नम्बर ३ का अध्यक्ष कृष्ण गोपाल थापा, मन्थली नगर युवा समितिका अध्यक्ष पुष्कर भट्टराई र मन्थली नगरपालिका महिला बालबालिका तथा सामाजिक परिचालन उपशाखाका प्रतिनिधि भगवती तामाङ लगाएको सहभागीता रहेको थियो ।
कार्यक्रम मन्थली नगरपालिका वडा नं ३ को वडा कार्यालय कठजोरमा भएको थियो ।
