रामेछाप- प्रधानमन्त्री कृषि आधुनिकीकरण परियोजना, परियोजना कार्यन्वयन इकाई रामेछापले बाख्रा पालक कृषकहरुलाई बाख्रा पालन सम्बन्धी तालिम दिन सुरु गरेको छ । परियोजनाले बाख्रा जोनमा आवद्ध भएका अगुवा कृषकहरुलाई आधुनिक र व्यवस्थित बाख्रापालन व्यवसाय विस्तारलाई सहयोग पुर्याउने उद्देश्यले तीन दिने तालिम दिन सुरु गरेको हो ।
तीन दिन सम्म चल्ने तालिममा पशु पालक कृसानले जानकारी पाउनु पर्ने कानूनी कुरा देखि आधुनिक र व्यवस्थित बाख्रापालन व्यवसाय विस्तार सम्मको ज्ञान प्राप्त हुने परियोजना कार्यन्वयन इकाइका प्रमुख थिरलाल गैह्रले बताए । तालिम उद्घाटन कार्यक्रममा बोल्दै प्रमुख गैह्रेले तीन दिन सम्मको बसाइमा बाख्रा पालनमा देखा परेका समस्या देखि भविष्यमा आउन सक्ने विभिन्न समस्याको बारेमा समेत जानकारी लिन र जिज्ञसा राख्न सहभागीहरुलाई अनुरोध गरे ।
बाख्रा जोन संचालक समितिका सदस्य हिरा गिरीको अध्यक्षता एवं रामेछाप जिल्ला अदालतका श्रेस्तेदार रामप्रसाद पौडेलको प्रमुख आतिथ्यतामा कार्यक्रम भएको थियो ।
झण्डै २० जना सहभागी रहेको तालिममा पशु सेवा प्राविधिक रोहिनीराज चापागाइँले सहजीकरण गर्ने परियोजना कार्यन्वयन इकाई रामेछापका बेदराज काफ्लेले जानकारी दिए ।
