रामेछाप- शनिबार दिउँसो आगलागीबाट घरबिहिन बनेका रामेछाप नगरपालिका वडा नं ७ सुकाजोर रजयछापका ११ घरपरिवारलाई रामेछाप नगरपालिकाले तत्कालका लागि आवश्यक पर्ने राहत उपलब्ध गराएको छ । नगर उपप्रमुख सृजना खड्काको नेतृत्वमा घटनास्थल पुगेको नगरको टोलीले पीडित परिवारलाई बास बस्नको लागि पाल, ओढ्ने आछ्याउने कपडा, खाद्यन्न, पानी, खाना पकाउने भाँडा लगायतका राहत सामाग्री उपलब्ध गराएको छ ।
तत्कालिन राहत सहित घटना स्थलमा पुगेकी उपप्रमुख सृजना खड्काले आगलागीबाट पीडित भएका परिवारलाई दुखी नहुन आग्रह गर्दै घरबिहिन बनेका परिवारलाई दीर्घकालिन बस्ने व्यवस्था मिलाउने जिम्मा नगरको भएकाले नगरले त्यसको जिम्मा लिने बताइन् । उनले २०७२ सालको भूकम्पलाई स्मरण गर्दै अपरझट आइपर्ने विपत्तीबाट कोही पनि आत्तिन नहुने र त्यसको दीर्घकालिन समधान समेत राज्यले गर्ने भएकाले ११ घरपरिवारलाई राज्यबाट पाउने सेवासुविधा दिलाउन आफूहरु लाग्ने प्रतिवद्धता व्यक्त गरिन् ।
घटना स्थलमा पुगेको टोलीले पीडित परिवारलाई तत्कालको लागि बस्ने व्यवस्था मिलाएर फर्केको र नगरपालिकाबाट प्रति परिवार दश हजारका दरले थप राहत पनि उपलब्ध गराइने उपप्रमुख खड्काले बताइन् ।
आगलागीबाट धन बहादुर श्रेष्ठ, ठेक बहादुर मगर, एकलाल श्रेष्ठ, हिमलाल श्रेष्ठ, चिरन्जीवी श्रेष्ठ, इश्वरीलाल श्रेष्ठ, धन बहादुर मगर, दल बहादुर मगर, भिमलाल श्रेष्ठ र चेत बहादुर मगरको घर जलेर नष्ट छन् ।
