रामेछाप- रामेछाप उद्योग वाणिज्य संघको स्थापना भएको २९ वर्ष पुरा भएको छ । २०४९ साल फागुन २१ गते अर्थात २९ वर्ष अघि आजकै दिन प्रज्वल कुमार बज्राचार्यको अध्यक्षतामा ११ सदस्यीय कार्यसतिबाट सुरु भएको रामेछाप उद्योग वाणिज्य संघले शनिवार २९ औं स्थापना दिवस मनाउँदै स्थापनाकाल देखि संघलाई अहिलेको अवस्था सम्म ल्याउन योगदान गर्ने संस्थापक अध्यक्ष तथा पदाधिकारीहरू, सदस्यहरू, पुर्व अध्यक्ष लगायतलाई सम्मान गरेको छ ।
सम्मानित हुनेहरुमा वाणिज्य संघका पुर्व अध्यक्ष एवं विशिष्ट सदस्य पशुपति बहादुर खड्का, पुर्व महासचिव एवं सल्लाहकार जगन्नाथ दाहाल, संस्थापक अध्यक्ष प्रज्वल कुमार वज्राचार्य, पुर्व अध्यक्ष लोक बहादुर श्रेष्ठ र वर्तमान वाणिज्य उपाध्यक्ष दामोदर थापा सम्मानित भएका छन् । त्यस्तै रामनारायण श्रेष्ठ, निरोज कुमार श्रेष्ठ व्याञ्जु, कृष्ण प्रसाद ढुङगेल, चेतबहादुर खड्का, तुलसीदास उदाश, नारायण प्रसाद पौडेल, सुरेन्द्र कुमार केसी, उत्तमराज भट्टराई र यम बहादुर रानामगर पनि सम्मानित भएका छन् । संस्थाले रामेछाप उद्योग वाणिज्य संघमा कार्यरत कर्मचारी संगीता श्रेष्ठलाई पनि सम्मान गरेको छ ।
रामेछाप उद्योग वाणिज्य संघ रामेछापका अध्यक्ष केशव प्रसाद घिमिरेको अध्यक्षतामा भएको कार्यक्रममा मन्थली नगरपालिकाका नगर प्रमुख रमेश कुमार बस्नेत, प्रमुख जिल्ला अधिकारी दीपक कुमार पहाडी लगायतले शुभकामना मन्तव्य राखेका थिए ।
२९ वर्ष अघि स्थापना भएको भएपनि रामेछाप उद्योग वाणिज्य संघले अघिल्लो वर्ष देखि आफ्नो स्थापना दिवस मनाउन थालेको कार्यकारी अधिकृत नबीन केसीले बताए । रामेछाप उद्योग वाणिज्य संघले आफ्नो २९ औं वर्षको अवसरमा शुक्रबार बजार सरसफाइ कार्यक्रम गरेको थियो भने २१ गते विहान औपचारिक कार्यक्रम गरी १४ जनालाई सम्मान गरेको छ ।
२९ वर्षको यात्रामा रहेको रामेछाप उद्योग वाणिज्य संघमा हाल १ हजार ३ सय ६० जन सदस्यहरु रहेका छन् ।
