रामेछाप- जिल्ला समन्वय समिति रामेछापका प्रमुख प्रेम बहादुर खड्काले पत्रकारहरुले लेख्ने हरेक समाचार आम पठकले खोजेर पढ्ने बनाउनु पर्ने बताएका छन् । नेपाल आदिवासी जनजाति पत्रकार महासंघ रामेछाप शाखाको चौथो जिल्ला अधिवेशनमा आफ्नो भनाई राख्दै प्रमुख खड्काले गुणस्तरयुक्त पत्रकारितालाई अगाडि बढाउँदै पत्रकारले लेखेको एउटा समाचार आम पाठकले खोजेर पढ्ने स्तरको बनाउनु पर्ने धारणा राखेका हुन् ।
राज्यको चौथो अंगको रुपमा रहेको पत्रकारितामा पछिल्लो समय केही बिकृतिहरु भित्रदै गएको र पाठकले पढ्ने समाचारमा गुणस्तर नहुँदा पत्रकारिता प्रति आम नागरिकको विश्वास गुम्दै गएकाले पत्रकारिता प्रति नागरिकको विश्वास कायम राख्नको लागि पनि पत्रकारले लेख्ने हरेक समाचार गुणस्तरीय र निस्पक्ष हुन आवश्यक रहेको खड्काले बताए ।
अहिले केही लेख्नु पर्ने समाचार नलेखिने र नलेख्नु पर्ने समाचारहरु लेखिएका उदहारणहरु पनि प्रसस्तै भएकाले त्यस्ता समाचारको पहिचन गरेर मात्रै लेख्दा पत्रकारिताको विकासमा थप सहयोग पुग्ने उनले बिश्वास गरे । कार्यक्रमका प्रमुख अतिथि समेत रहेका जिसस प्रमुख खड्काले रामेछापको विकासमा पत्रकारहरुको भूमिका महत्वपूर्ण हुनु पर्ने धारणा समेत राखेका छन् ।
मन्थली नगरपालिकाका नगर प्रमुख रमेश कुमार बस्नेतले नेपाल जस्तो विविधतायुक्त मुलुकलाई विविधतायुक्त पहिचन दिलाउन नेपाल आदिवासी जनजाति पत्रकार महासंघको महत्वपूर्ण योगदान रहेको चर्चा गर्दै समाजप्रतिको दायित्वलाई सम्झेर विभिन्न कारणले छरिएर रहेको समाजलाई एकताको सुत्रमा ल्याउन पत्रकारहरुले कलम चलाउनु पर्ने बताए । सस्थानीय सरकारले गर्ने विकासमा पत्रकारहरु थप सहयोगीको रुपमा रहेकाले त्यो भूमिकालाई कायम राख्न अनुरोध गर्दै नगर प्रमुख बस्नेतले पत्रकार हकहितको लागि स्थानीय सरकार पनि सधैँ सहयोगी रहने विश्वास दिलाए ।
आफू निर्वाचित भएर आएदेखि नै पत्रकार हकहितको लागि एक अक्षय कोषको स्थापना गर्ने भनिएको र सोही अनुसार अक्षय कोष स्थापनाको काम अन्तिम चरणमा पुगेको बस्नेतले बताए । नगर प्रमुख बस्नेले मन्थली नगरको आउँदो नगर अधिवेशनबाट अक्षय कोषलाई संचालनमा ल्याउने योजना रहेको बताए ।
नेपाल आदिवासी जनजाति पत्रकार महासंघ (फोनिज) रामेछापका अध्यक्ष नवराज श्रेष्ठको अध्यक्षमा सदरमुकाम मन्थलीमा विहिबार भएको कार्यक्रममा रामेछापका प्रमुख जिल्ला अधिकारी दिपक कुमार पहाडी, नेपाल पत्रकार महासंघ बागमती प्रदेशका कोषाध्यक्ष रमेश ढुंगेल, नेपाल पत्रकार महासंघ रामेछापका अध्यक्ष बद्री नयाँघरे, नेपाल आदिवासी जनजाति पत्रकार महासंघ (फोनिज) बागमती प्रदेशका उपाध्यक्ष युवराज श्रेष्ठ, समाजबादी प्रेस संगठन नेपालको केन्द्रीय सदस्य कैलाश खत्री, प्रेस चौतारी रामेछापका अध्यक्ष युनिक बिफा घिसिङ, नेपाल प्रेस युनियनका अध्यक्ष अप्रिल अधिकारी, आदिवासी जनजाति महासंघ जिल्ला समन्वय समिति रामेछापका अध्यक्ष श्रीबहादुर माझी लगायतले शुभकामना मन्तव्य राखेका थिए ।
रामेछापमा नेपाल आदिवासी जनजाति पत्रकार महासंघ र आदिवासी जनजाति पत्रकारको अवस्थको बारेमा फोनिजका पुर्वाध्यक्ष सुमित श्रेष्ठले एक कार्यपत्र प्रस्तु गरका थिए ।
