रामेछाप- चोरी तथा डकैती मुद्दामा १४ लाख ८३ हजार ३ सय ४७ रुपैया जरिवाना सहित १ सय २९ वर्ष कैद सयज तोकिएका फरार व्यक्तिलाई सिन्धुली प्रहरीले पक्राउ गरेको छ । ६ वटा जबरजस्ती चोरी र १२ वटा डाँका चोरी मुद्दामा नगद जरिवाना सहित जिल्ला अदालत तनहुँले १ सय २९ वर्ष कैद सजय तेकेका सिन्धुली जिल्ला तिनपाटन गाउँपालिका वडा नं १ बेलघारीका मेषबहादुर थापालाई सिन्धुली प्रहरीले पक्राउ गरेको हो ।
जिल्ला अदालत तनहुँको २०७१ वैशाख १७, २०७२ जेठ ४ र जेठ १४ गतेको फैसलाले ६ वटा जबरजस्ती चोरी र १२ वटा डाँका चोरी मुद्दा तथा जिल्ला अदालत सिन्धुलीको विभिन्न १८ वटा लगत नम्बरले दोषी ठहर भई विगत लामो समय देखि फरार रहेका व्यक्तिलाई खोजी गर्ने क्रममा सोमबार साँझ उनकै घरबाट पक्राउ गरिएको सिन्धुलीका प्रहरी प्रवक्ता मनोज कुमार लामाले बताए ।
‘चोरी तथा डकैतीमा कुख्यात मानिएका विभिन्न १८ ओटा मुद्दामा दोषी ठहरिएका तर, लामो समय देखि फरार रहेका मगर कान्छा भनेर चिनिने मेषबहादुरलाई प्रहरीले खोजीरहेको थियो,’ प्रहरी प्रवक्ता लामाले भने,‘ फरार व्यक्ति विदेश भएको र केही महिना अघि मात्रै नेपाल आएको सूचनालाई आधार मान्दै खोजी गर्ने क्रममा हामीले थापालाई उनकै घरबाट पक्राउ गर्न सफल भयौँ ।’
अन्दाजी ३० वर्ष उमेरका थापालाई पक्राउ गरेर आवश्यक कारबाहीका लागि मंगलबार नै सिन्धुली जिल्ला अदालतमा पेश गरिएको प्रवक्ता लामाले बताए । आफू प्रहरी सेवामा रहेर सेवा गर्दा यति धेरै वर्ष कैद सजाय भएका व्यक्ति आफूले नभेटेको बताउँदै प्रहरी प्रवक्ता लामाले सिन्धुली जिल्लाको हकमा यो नै पहिलो घटना भएको दावी गरे ।
