रामेछाप – डेढ दशक देखि पत्रकारिता क्षेत्रमा क्रियाशिल भानुभक्त निरौलाले २५ घण्टा २७ मिनेट लामो रेडियो अन्तरवार्ता लिएर विश्व रेकर्ड कायम गरेका छन् । विश्व रेकर्डका लागि लिइएको अन्तरवार्ताका जवाफकर्ताको रुपमा पर्यटनविद् आङफिन्जो शेर्पा थिए ।
गिनिज बुक अफ वल्र्ड रेकर्डमा नाम दर्ज गर्ने उद्देश्यले शुरु गरिएको ‘सबैभन्दा लामो रेडियो अन्तरवार्ता’ सोमबार विहान ७.३५ देखि शुरु गरिएको थियो । हिमाल एफ.एम.को चावहिल स्थित शाखा स्टुडियोमा आयोजित अन्तरवार्ता मंगलबार विहान ९.०३ सम्म जारी थियो ।
‘पर्यटन र जलवायू परिवर्तनको असर’ विषयमा विश्वकै लामो रेडियो अन्तरवार्ता गरेर पत्रकार निरौला र पर्यटनविद् शेर्पाले गिनिज बुक अफ वल्र्ड रेकर्डमा यसअघि दर्ज रेकर्ड ब्रेकका लागि दाबी पेश गरेका छन् । यसअघि यो विधाको रेकर्ड अष्ट्रेलियाका पत्रकार रिचार्ड ग्लोभलले स्पोर्टस म्यान पेटर फिट्जसिमनसंग २४ घण्टा अन्तरवार्ता गरेर पछिल्लो रेकर्ड बनाएका थिए ।
पुर्वाञ्चल विश्वविद्यालयबाट पत्रकारितामा स्नातकोत्तर गरेका निरौला हाल हिमाल एफ.एम.को प्रबन्ध निर्देशक हुन् भने मोफसलबाट कान्तिपुर टेलिभिजन र कान्तिपुर दैनिकमा रिर्पोटिङ गर्छन् । उनी सोलुखुम्बु सल्यानका स्थानीय समेत हुन् ।
समाचारः www.himalsamachar.com
