कुलमान घिसिङज्यू फेरि पनि बधाई छ ! यो बधाई दिने क्रममा म केहि गुनासो राख्दैछु ।
तपाईं रामेछापको सान हो, देश भरि विद्युतका समस्याहरु धेरै छन् तर पनि रामेछापको मात्र कुरा गर्दा हामी रामेछापका मान्छे विद्युतबाट धेरै पिडित छौं । मिनेटमिनेटमा विजुलि आउने जाने समस्या यहाँ धेरै छ । तार टाँगिएको छ तर विजुलिको उज्यालो देख्न नपाउने ठाउँ यहाँ धेरै छन् । हाम्रै पानीबाट उत्पादन गरिएको खिम्तीको विजुली हामीले बाल्न पाएका छैनौं । ढल्के सवस्टेसनमा विग्रेको ट्रान्सफरमर बनाउन महिनौं लाग्छ । हाम्रो फुलासीमा बनेको सवस्टेशनमा आएको विजुली हाम्रै भूमिबाट गएको छ तर हामीलाई त्यो विजुली बाल्ने अवसर कहिले दिने वा नदिने टुंगो छैन । रामेछापमा भर्खर खुल्न लागेका उद्योगहरु विद्युत अनियमित भएका कारण बन्द हुने स्थितिमा पुगेका छन् । सबैले दुःख व्यहोर्नु परेको अवस्था छ । अब हामीलाई ढल्केबर हुँदै आउने कुलेखानीको र चरिकोट हुँदै आउने लामोसाँघुको विजुली हैन हाम्रो आफ्नै भूमि देविटारमा बनेको सवस्टेशनमा आएको ३३ केभिएको प्रशारण लाईन मार्फत विजुली बाल्ने व्यवस्था मिलाइदिनुहुने छ भन्ने विश्वास हामी रामेछापवासीले लिएको छौं ।
सुनकोसी–२ जलविद्युत आयोजनाको कारण रामेछाप जिल्लाको सदरमुकाम मन्थली लगायतका स्थानहरु डुवानहुने चर्चा धेरै अगाडिबाट चलिरहेको छ । यसको कारण घरजग्गा विक्रि र मुल्यांकनको कार्यमा अवरोध भएको छ । यो योजनालाई तार्किक निर्णयमा पुर्याउने काम तत्काल गर्न तपाईंले अगुवाई गर्नुहुनेछ भन्ने विश्वास यहाँका जनताले राखेका छन् ।
साथै अहिलेको सिस्टमबाट विजुलि बाल्न बहुत महंगो सावित भएको छ विजुलीको विलमा सँधै जोडिने डिमाण्ड शुल्क मिनाहा गराईयोस् र कोभिडको बेला लकडाउन अवधिभरको विद्युतको विल मिनाहा होस् भन्ने अनुरोध गर्दछु । नागरिकहरुलाई प्रत्यक्ष फाइदा पुग्ने यि र यस्ताखाले कार्यले तपाईंको उचाइ बढाउन थप मद्दत पुग्ने छ । तपाईंको दोश्रो कार्यकालको सफलताको शुभकामना सहित जय नेपाल
लेखबहादुर कार्की
सचिव– नेपाली काँग्रेस जिल्ला कार्यसमित, रामेछाप
