युवराज सुवेदी, रामेछाप– रामेछाप नगरपालिका वडा नं ८ ले वडाका सबै घरपरिवारलाई पुर्याउने गरी हिलट्यांक वितरणको अभियान सुरु गरेको छ । आर्थिक वर्ष २०७६/०७७ अदेखि चालु आर्थिक वर्ष २०७८/०७९ सम्ममा वडाका सबै नागरिकलाई ‘एक घर, एक हिलट्यांक’ अभियान चलाएर हिलट्यांकी उपलब्ध गराउन थालेको छ ।
रामेछाप नगरपालिका वडा नं ८ पनि सुख्ख ग्रस्त क्षेत्र भित्र परेको र वडाका स्थानीयहरुलाई खाने पानी देखि आफ्नै घरको लागि तरकारी उत्पादन गर्नको लागि समेत पानीको समस्या हुने भएकाले एक ‘एक घर, एक हिलट्यांक’ अभियान चलाइएको वडाध्यक्ष केदार कार्कीले बताए । आर्थिक वर्ष २०७६/०७७ देखि कृषि कार्यक्रम अन्तरगत रहेर आर्थिक वर्ष २०७८/०७९ सम्ममा सबै घरपरिवारलाई ट्यांकी वितरण गरी सक्ने योजना अनुसार गत आर्थिक वर्षको बजेटबाट खरिद गरिएका ट्यांकी वितरण सुरु गरिएको वडाध्यक्ष कार्कीले बताए । सतप्रतिशत वडाको लागतमा सबै घरपरिवारलाई निःशुल्क उपलब्ध गराइएको हिलट्यांकीले घरयासी प्रयोजन देखि कृषि जन्य बस्तु उत्पादनको लागि ठूलो सहयोग पुग्ने विश्वास आफूले लिएको वडाध्यक्ष कार्कीको भनाई रहेको छ ।
पानीको समस्या झेल्दै आएका वडाका नारीकहरुलाई घरमा बढी भएको पानी र आकाशे पानी संकलन गरी फलफुल तथा तरकारी उत्पादन गरेर आत्मनिर्भर बन्न सहयोग पुग्ने समेत वडाले अपेक्षा लिएको छ ।
भूकम्प पश्चत निजी आवसको लागि रातो कार्ड प्राप्त गरेका वडामा करिव एक हजार भन्दा बढी घरपरिवार रहेको र त्यही रातो कार्डलाई आधार बनाएर ट्यांकी वितरण गरिएको वडाले बताएको छ ।
हिलट्यांक वितरण कार्यक्रममा बोल्दै रामेछाप नगरपालिकाका नगर प्रमुख नर बहादुर थापामगरले वडाले आफ्नो वडाका सबै घरपरिवारलाई उलब्ध गराएको हिलट्यांकले कृषि उत्पादनमा थप सहयोग पुग्ने बताए । ट्यांकी वितरण एउटा नमूना काम भएकाले ट्यांकी प्राप्त गर्ने सबैले सदुपयोग गरेर कृषि उत्पादनलाई सहयोग पुग्ने गरी प्रयोग गर्न अनुरोध गरेका छन् ।
शनिबारबाट सुरु गरिएको ट्यांकी वितरण कार्यक्रम आइतबार र सोमबार पनि चल्ने वडाध्यक्ष केदार कार्कीले बताएका छन् । उनका अनुसार चालु आर्थिक वर्षको बजेटबाट ट्यांकी नपुगेका नागरिकलाई चालु आर्थिक वर्षमा वितरण गरिने छ ।
