रामेछाप– मन्थली नगरपालिकाले दोस्रो मन्थली मेयर कप २०७७ चैत्र २५ गते देखि २८ गते सम्म संचालन गर्ने भएको छ । मन्थली नगर खेलकुद विकास समितिको बैठकले चैत्र २५ गते देखि २८ गते सम्म पुरुष भलिबल प्रतियोगिताको आयोजना गरेर दोस्रो मन्थली मेयर कप २०७७ संचालन गर्ने निर्णय गरेको हो ।
नगरपालिकामा खेलकुद क्षेत्रको विकासमा टेवा पुर्याउने गरी संचालनमा ल्याएको ‘मन्थली मेयर कप’ मार्फत नगरका १४ ओटै वडाका एक एक टिम र मन्थली नगरपालिकाको एक टिम गरी १५ टिमले सहभागिता जनाउने गरी प्रतियोगिताको आयोजना गर्न लागिएको मन्थली नगरपालिकाका नगर प्रमुख एवं मन्थली नगर खेलकुद विकास समितिका अध्यक्ष रमेश कुमार बस्नेतले बताए । प्रथम मन्थली मेयर कपलाई राष्ट्रिय स्तरमै खेलाउँदा अन्य जिल्लाको खेलाडी सहभागी भएको भएपनि नगरको खेलकुद विकासमा उपलब्धी नदेखिएकाले यस वर्ष देखि नगरपालिका भित्रका मात्रै खेलाडी सहभागी हुन पाउने गरी प्रतियोगिताको आयोजना गर्न लागिएको नगर प्रमुख बस्नेतले बताए ।
प्रतियोगिताको प्रथम, द्धितिय र तृतिय हुने टिमलाई सिल्ड, मेडल र नगद पुरस्कारको व्यवस्था रहेको मन्थली नगरपालिकाका महाशाखा प्रमुख हेमन्त बुढाथोकीले बताए । उनका अनुसार प्रथम, द्धितिय र तृतिय हुने टिमलाई क्रमशः १ लाख, ७५ हजार र ५० हजार नगदको साथमा सिल्ड र मेडल प्रदान गरिने छ । त्यस्तै सान्तोना हुने टिमलाई ३० हजार नदग पुरस्कार रहेको पनि महाशाखा प्रमुख बुढाथोकीले बताए ।
मन्थली नगर खेलकुद विकास समितिका अध्यक्ष एवं नगर प्रमुख रमेश कुमार बस्नेतको अध्यक्षमा चैत्र ६ गते बसेको बैठकले अरु उपसमितिहरु बनाएर प्रतियोगिताको थप तयारी भइरहेको समितिका सदस्य कैलाश खत्रीले बताए ।
मेयर कपमा भलिबल, फुटबल र ब्याटमिन्टन प्रतियोगि गर्न पाउने भएपनि यो वर्ष पुरुष भलिबल प्रतियोगिताको आयोजना गरिने मन्थली नगर खेलकुद विकास समितिले बताएको छ ।
१४ वटा वडाबाट सहभागी हुने टिममा वडाका खेलाडी बाहेक अरुले खेलाडीले सहभागिता जनाउन पाउने छैनन् ।
