रामेछाप– सरकारी स्वामित्वको दूरसञ्चार कम्पनी नेपाल टेलिकमले सदरमुकाम मन्थलीमा पहिलो पटक फाइबर टु दी होम सेवा सुरु गरेको छ । लामो समय देखि काम सुरु गरिएको भएपनि सोमबार देखि मात्रै उक्त सेवा सुरु भएको हो । मन्थली नगरपालिकाका नगर प्रमुख रमेश बस्नेत र रामेछापका प्रमुख जिल्ला अधिकारी गौलोचन सैंजूले सेवाको सुरुवात गरेका थिए ।
‘फाइबर टु दी होम’ सेवाको सुरुवाती कार्यक्रममा बोल्दै मन्थली नगरपालिकाका नगर प्रमुख रमेश कुमार बस्नेतले यस अघि आम सर्वसाधारणले टेलिफोन र इन्टरनेट प्रयोग गर्दा भोग्दै आएको समस्या समधान हुने विश्वास व्यक्त गरे । समयको माग अनुसार भित्रिएको सेवालाई कुनै पनि बेला समस्या नआउने गरी व्यवस्थापन गर्न नेपाल टेलिकमलाई आग्रह गरे ।
फरक प्रसंगमा नगर प्रमुख बस्नेतले नगर भित्र भित्रिएका नयाँ नयाँ प्रविधि विस्तारमा स्थानीयको अवरोधका कारण प्रयोगमा ल्याउन नसकेकोमा दुख व्यक्त गर्दै विकासमा सबै एक भएर लाग्नु पर्ने धाराण राखे ।
प्रमुख जिल्ला अधिकारी गौलोचन सैंजूले यस अघि आम सर्वसाधारण देखि आफ्नै कार्यालय समेतले दैनिक रुपमा भोग्दै आएको समस्या समधान हुने विश्वास व्यक्त गरे । प्रजिअ सैंजूले टेलिफोन र इन्टरनेट प्रयोग कर्ताको गुनासो नआउने गरी काम गर्न टेलिकमलाई निर्देशन दिए ।
लामो प्रयास पछि जिल्लामा सरकारी स्वामित्वको दूरसञ्चार कम्पनी नेपाल टेलिकमले पहिलो पटक अहिलेको द्रुत गतिको प्रविधि भित्र्याएकोले विगतमा भोग्दै आएका समस्या समधान हुँदै जाने दावी गरे । अब सेवाग्रहीका माग अनुसार सजिलै इन्टरनेट सेवा प्रदान गर्न सकिने उनले बताए ।
कार्यक्रममा उद्योग वाणिज्य महासंघ बागमती प्रदेशका कार्यकारिणी सदस्य श्याम थापा, नेपाल पत्रकार महासंघ रामेछापका अध्यक्ष रमेश ढुंगेल, रामेछाप उद्योग बाणिज्य संघ रामेछापका अध्यक्ष केशव घिमिरले आ–आफ्नो भनाई राखेका थिए ।
नेपाल टेलिकमका रिम÷सिम र रिचार्ज कार्ड विक्री वितरण गरेर टेलिकमलाई अधिक राजस्व बुझाउने मिलिजुली बिजुली पसल मन्थलीका प्रोप्राइटर नारायण बहादुर बस्नेतलाई नेपाल टेलिकमले सम्मान गरेको छ । नेपाल टेलिकमको अधिक लिज लाइन सेवा खरिद गरेबात हिमाल हाइड्रो कम्पनी किर्नेलाई पनि टेलिकमले सम्मान गरेको छ ।
