रामेछाप- उमाकुण्ड गाउँपालिकाले उद्यमी उत्पादन गर्न स्थानीयहरुलाई विभिन्न तालिम दिन सुरु गरेको छ । गाउँपालिकाले जंगलमा पाइने अमला देखि किसानले उत्पादन गरेको दुधबाट बन्ने विभिन्न परिकार बनाउने तालिम संचालन गरेर गाउँमै उद्योग स्थापना गर्न सक्ने गरी १ सय २७ जना स्थानीयलाई तालिम दिन सुरु गरेको हो ।
उमाकुण्ड गाउँपालिकाको आर्थिक सहयोग र ग्रामिण विजनेश प्रमोशन प्रा.लि.को प्राविधिक सहयोगमा ८७ जना नयाँ उद्यमी उत्पादन गर्ने र ४० जना पुराना उद्यमीहरुलाई स्तरोन्नति गर्ने गरी विहिबार देखि तालिम सुरु भएको छ । उमाकुण्ड गाउँपालिकाको वडा नं ४ सल्लेमा अमला, जुनार र सिस्नुबाट बन्ने विभिन्न परिकार बनाउन स्थानीयहरु तालिम लिन थालेका छन् । त्यस्तै वडा नं ४ मै दुधबाट बन्ने विभिन्न परिकारसँगै बेकरी सम्बन्धी तालिम लिन थालेका छन् ।
१५ दिन सम्म चल्ने तालिमको उद्घाटन गर्दै उमाकुण्ड गाउँपालिकाका अध्यक्ष शेर बहादुर सुनुवारले गाउँमै उत्पादन हुने विभिन्न खाद्य बस्तुबाट बन्ने नयाँ परिकार बनाउने तालिमले गाउँमा खेर जाने खाद्य बस्तुको सदुपयोग हुनुको साथै गाउँमा लघु उद्योगहरु स्थापना गरेर गाउँका युवाहरुलाई गाउँमै रोजगारी दिन सहयोग पुग्ने बताए । गाउँपालिका अध्यक्ष सुनुवरले गाउँपालिकाबाट पहिलो पटक संचालन भएको गरिवी निवरणको लागि लघु उद्यम विकास कार्यक्रममा सहभागीहरुलाई राम्रोसँग तालिम लिन अनुरोध गर्दै सीप सिकेर काम गर्न सुरु गर्ने सहभागीहरुलाई गाउँपालिकाले सहयोग गर्ने प्रतिवद्धता जनाए ।
उमकुण्ड गाउँपालिकाका प्रमुख प्रशासकीय अधिकृत इश्वरी प्रसाद सुवेदीले गरिवी निवरणको लागि लक्षित गरी संचालन गर्न लागिएको तालिमले जीविको पार्जनमा सहयोग पु¥याउँदै आत्मनिर्भमा समेत सहयोग पुग्ने विश्वस व्यक्त गरे । उमाकुहण्ड गाउँपालिका वडा नं ४ का वडाध्यक्ष मान बहादुर सुनुवारले तामिल पश्चात फलफुलबाट बन्ने जुस, दुधबाट बन्ने दुधजन्य बस्तु र बेकरीका परिकारहरु गाउँमै उत्पादन गर्न सकिने भएकाले शहरबाट ल्याउनु पर्ने बाध्यता हट्ने बताए ।
त्यस्तै तालिम उद्घाटन कार्यक्रममा बोल्दै ग्रामिण विजनेश प्रमोशन प्रा.लिका कार्यक्रम संयोजक युवराज सुवेदीले दक्ष जनशक्तीबाट तालिमहरु संचालन हुने भएकाले तालिमबाट अपेक्षा गरिएका उद्देश्य पुरा हुने विश्वास व्यक्त गरे ।
१५ दिन सम्म संचालन हुने सीप विकास तालिममा सिस्नुको पौडर बनाउन सिकाइने उमाकुण्ड गाउँपालिकाका वरिष्ठ उद्यम विकास सहजकर्ता रण बहादुर कार्कीले बताए । कार्कीका अनुसार फलफुल प्रसोधन तालिमबाट अमला, अदुवा, जुनार र सुन्तलाको जुस उत्पादन गर्न सिकाइने छ । त्यस्तै बेकरी तथा डेरी सम्बन्धी तालिममा दुध तथा दुध जन्य बस्तुको परिकार बनाउन सिकाइने छ ।
बाँकी रहेका पशु पालन, आलु चिप्स र तरकारी खेतीको तालिम पनि चाँडै संचालन हुने वरिष्ठ उद्यम विकास सहजकर्ता रण बहादुर कार्कीले बताए ।
नयाँ उद्यमी उत्पादनको लागि उमाकुण्ड गाउँपालिकाको वडा नं ४ र ५ छनौट भएका छन् भने पुराना उद्यमीको स्तरोन्नति कुन वडामा गर्ने भन्ने निर्णय हुन बाँकी रहेको छ ।
