रामेछाप- रामेछाप जिल्लामा संचालन गरिएको राष्ट्रिय आर्थिक गणना २०७५ को जिल्लास्तरीय नतिजा सोमबार रामेछाप सदरमुकाम मन्थलीमा सार्वजनिक भएको छ । तथ्यांक कार्यालय सिन्धुलीको आयोजनामा सम्पन्न गोष्ठीमा जिल्लाको आर्थिक गणनाको प्रतिवेदन सार्वजनिक गरिएको हो ।
प्रमुख जिल्ला अधिकारी अर्जुन कुमार शर्माको अध्यक्षता सम्पन्न नतिजा सार्वजनिक गोष्ठीमा तथ्यांक कार्यालय सिन्धुलीका अधिकृत टीका नेपालले जिल्लाको आर्थिक स्थितिको तथ्याका बारेमा जानकारी गराएका छन् । तथ्यांक कार्यालय सिन्धुलीले जिल्लाको आर्थिक पक्ष समेटेर रामेछापका ८ वटै स्थानीय तहहरुको बस्तुगत विवरण सहितको किताव समेत प्रकाशन गरि सार्वजनिक गरेको छ ।
प्रतिवेदनमा विशेषगरी जिल्लाको आर्थिक कृयाकलाप तथा रोजगारीको अवस्था, सहकारी, पर्यटन लगाएतका आर्थिक पाटोलाई विशेष गरी समेटन खोजिएको कार्यालयले जनाएको छ । त्यस्तै स्थानीय तहगत रुपमा पनि आर्थिक अवस्थाको विश्लेषण गर्ने काम प्रतिवेदनमा गरिएको छ ।
प्रतिवेदनमा तथ्यांकगत रुपमा केही कमजोरी हुन सक्ने भएपनि कमीकमजोरीहरुलाई सुधार गर्दै जिल्लाको विकासका लागि यसलाई आवश्यक मार्गदर्शक बनाएर अघि बढ्न सकिने रामेछापका प्रमुख जिल्ला अधिकारी अर्जुन कुमार शर्माले बताए ।
प्रतिवेदन सार्वजनिक समारोहमा सहभागीहरुले तथ्यांकहरुलाई अझ विशिष्ट बनाउनका लागि थप सुझाव समेत दिएका थिए ।
