रामेछाप– रामेछापको लिखुतामाकोशी गाउँपालिका वडा नम्बर २ सैपुले विद्युतीकरणमा जोडिएर आएका विभिन्न समाचारमा कुनै सत्यता नरहेको प्रष्ट पारेको छ । सैपुलाई पूर्ण विद्युतीकरणको लागि मिटर खरिद तथा जडानमा लाग्ने खर्चमा वडाध्यक्षले लाग्ने भन्दा बढी पैसा उठाएको भन्ने समाचारमा कुनै सत्यता नभएको भन्दै वडा कार्यालयले एक प्रेस विज्ञप्ती जारी गरेको छ ।
वडाध्यक्ष पदम तामाङद्वारा जारी विज्ञप्तीमा भनिएको छ– ‘रामेछाप जिल्ला लिखुतामाकोशी गाउँपालिकाको उज्यालो लिखु अभियान अन्तरगत वडा नं २ सैपुमा क्रमागत रुपमा विद्युत प्राधिकरणबाट टेन्डर प्रक्रिया खुलाई संचालन गरिएको विद्युतीकरण कार्यक्रमको अन्तिम चरणमा स्थानीय उपाभोक्ताहरुसँग समन्वय गरी वडा कार्यालयको बैठकको निर्णय अनुसार र विद्युत प्राधिकरणले मिटर बक्सको लागि उठाउने रकम यकिन नगरेकाले प्रतिघर दुई हजार सात सयका दरले उठाएको हो । यसरी रकम उठाएको विषयलाई लिएर बढी रकम उठाएर भ्रष्ट्रचार भएको भन्ने जस्ता भ्रामक समाचार आएको हुँदा त्यसरी आएका सामाचारमा कुनै सत्यता छैन् ।’
विद्युतीकरणको काम पूर्ण रुपमा सम्पन्न भएपछि सार्वजनिक सुनुवाई गरेर सबै नागरिकलाई जानकारी गराउने समेत उक्त विज्ञप्तीमा उल्लेख गरिएको छ ।
त्यस्तै मिटर खरिदको विषयमा जिल्ला प्रहरी कार्यालयमा विद्युतीकरणको सवालमा पैसा फिर्ता गर्छु भनी कागज गरिएको भन्ने भ्रामक हल्ला समेत सत्यता नरहेको पनि प्रेस विज्ञप्तीमा उल्लेख गरिएको छ ।
विगत दुई वर्ष देखि सैपुमा भइरहेको विद्युतीकरणको लागि वडा कार्यालयको समन्वयमा नेपाल विद्युत प्राधिकरण रामेछाप वितरण केन्द्रले हाल सम्म ३ सय ५ घर परिवारको लागि मिटर उपलब्ध गराइसकेको छ ।
