रामेछाप– रामेछापमा पाँच जना प्रहरी सहित थप ६ जनामा कोरोना भाइरस संक्रमण पुष्टि भएको छ । भदौ २३ गते स्वाब संकलन गरी पठाईएका २७ जना मध्ये जिल्ला प्रहरी कार्यालय रामेछापमा कार्यरत पाँच जना प्रहरी र मन्थली नगरपालिका वडा नम्बर १ की एक महिला सहित ६ जनाको रिपोर्ट पोजेटिभ आएको स्वास्थ्य कार्यालय रामेछापले बताएको छ ।
संक्रमित सबै भदौ १९ गते संक्रमण पुष्टि भएका व्यक्तिहरुको सम्पर्कमा आएका व्यक्तिहरु रहेको स्वास्थ्य कार्यालय रामेछापका जनस्वास्थ्य अधिकृत भुवन थापाले बताए । भदौ १९ गते जिल्ला प्रहरी कार्यालय रामेछापका पाँच प्रहरी र तामाकोशी अस्पतालमा कार्यरत एक स्वास्थ्यकर्मीमा कोरोना भाइरस पुष्टि भएको थियो ।
थापाका अनुसार संक्रमित हुने ५ जना प्रहरीहरु क्रमशः २७, २७, ३४, ३८ र ४७ वर्षका रहेका छन् । त्यस्तै मन्थली १ की महिला ८६ वर्षकी रहेकी छिन् ।
