रामेछाप– रामेछापमा एक कर्मचारी सहित थप तीन जनामा कोरोना भाइरस संक्रमण पुष्टि भएको छ । बिहिबार अपरान्ह स्वास्थ्य मन्त्रालयको प्रेस बिफ्रिङमा धुलिखेल अस्पतालमा दुई जना र किटजन्य रोग अनुसन्धन केन्द्र प्रयोगशाला हेटौडामा एक जना गरी रामेछापका तीन जनामा कोरोना पुष्टि भएको जनाएको छ ।
धुलिखेल अस्पतालमा पोजेटिभ देखिएका दुई जना मध्ये एक जना मन्थली नगरपालिकाका पुरुष कर्मचारी र एक जना कुवेतबाट फर्केका मन्थली नगरपालिका वडा नम्बर ५ का पुरुष रहेको जिल्ला अस्पताल रामेछापका डा. आनन्द आचार्यले जानकारी दिनुभयो । आचार्यका अनुसार कोरोना पोजेटिभ देखिएका मन्थली नगरपालिकाका कर्मचारीलाई आइसोलेशनमा राखिसकिएको छ भने कुवेतबाट फर्केका मन्थली ५ का व्यक्ति क्वारेन्टाइनमै रहेका छन् ।
हेटौडाको प्रयोगशालामा पोजेटिभ देखिएका व्यक्तिको बारेमा जानकारी लिने काम भईरहेको पनि आचार्यले जानकारी दिनुभयो ।
