रामेछाप– रामेछाप नगरपालिकाले पर्यटन प्रवर्द्धनको लागि विभिन्न कार्यक्रम संचालन गर्दै आएको छ । नगरभित्र रहेका पर्यटकिय स्थलहरुको खोजी कार्य गर्ने देखि प्रचार प्रसार गर्दै आएको नगरपालिकाले पर्यटकहरुका लागि स्थानीय स्तरमै उत्पादित खाना खुवाउने र बस्नको लागि होमस्टे पनि संचालनमा ल्याएको छ ।
रामेछाप नगरपालिकाको वडा नं ६ र ७ को संगम स्थल भालुखोपमा ‘भालुखोप सामुदायिक होमस्टे’ संचालनमा आएसँगै पर्यटन प्रवद्र्धनमा थप सहयोग पुग्ने नगरपालिकाले अपेक्षा लिएको छ । ‘भालुखोप नगरपालिकाको मात्रै नभएर जिल्लाकै नमूना पर्यटकिय स्थल हो, त्यसैले हामीले पर्यटकहरुका लागि आवश्यक पर्ने आधरभूत कुरा देखि संरचना निर्माण सम्मका कामहरु गर्दै छौँ, नगर प्रमुख नर बहादुर थापामगरले भन्नुभयो, ‘सामुदायिक होमस्टे संचालन देखि भिउ टावर बनाउने सम्मका कामले अहिले तिब्रता पाइरहेको छ ।’
आर्थिक वर्ष २०७६/०७७ को कार्यक्रम अनुसार नगरपालिकामा रहेका सामुदायिक होमस्टेलाई प्रवद्र्धन गर्ने गरी होमस्टे संचालनका लागि तालिमसँगै भालुखोप सामुदायिक होमस्टेलाई आवश्यक सामग्री समेत उपलब्ध गरइएको प्रमुख प्रशासकीय अधिकृत दिपेन्द्र पौडेलले बताउनुभयो । पर्यटकीय स्थलको रुपमा रहेको भालुखोप डाँडामा आन्तरिक तथा बाह्य पर्यटकहरु भित्राउने उद्देश्यले संचालनमा ल्याइएका ९ ओटा होमस्टेलाई ९ थान ग्याँस सिलिन्डर, ९ थान चुल्हो, ९ थान भट्टी चुल्हो, ९ थान मम पकाउने भाँडो, ९ थान फ्रई पेन, ९ थान फिल्टर, ६३ थान चरेसको थाल र ६३ थान चरेसको कचौरा उपलब्ध गराईएको पनि पौडेलले बताउनुभयो ।
होमस्टे संचालनको लागि नगरपालिकाले दिएको तालिम र उपलब्ध गराईएको विभिन्न प्रविधिहरुले आफूहरुलाई व्यवसाय संचालनको लागि उत्साहित बनाएको भालुखोप सामुदायिक होमस्टेका अध्यक्ष लाल बहादुर तामाङले बताउनुभयो । तामाङले भन्नुभयो– ‘भालुखोप डाँडामा यस अघि देखि नै पर्यटकहरु आउने गर्थे तर हामीसँग सिप र पूर्वधार नभएको कारण चाहे जस्तो सेवा दिन सकेका थिएनौँ, अहिले होमस्टे संचालनको लागि दर्ता प्रक्रिया देखि स्थानीय स्तरमै उत्पादित खाना बनाउने सम्मका तालिम पाएपछि हामीलाई धेरै सहज भएको छ ।, यसले यहाँको पर्यटन प्रवद्र्धनमा थप सहयोग पुग्छ ।’
भालुखोप सामुदायिक होमस्टे संचालनमा आएपछि अन्य होटलको भन्दा सस्तो मूल्यसँगै आर्गनिक खाना खुवाउन सकिने पनि अध्यक्ष तामाङले बताउनुभयो । अध्यक्ष तामाङले भालुखोपबाट देखिने मनोरम दृष्य अवोलकन गर्न आउने पर्यटकहरुलाई आफूहरुले दिने सेवा एक पटक लिएर सुझाव दिन आग्रह समेत गर्नुभयो ।
