मन्थली- जिल्लाको खाँडादेवी गाउँपालिकाबाट सोमबार दिउँसो बिरामी अवस्थामा रहेको चितुवा नियन्त्रणमा लिएको छ । खाँडादेवीको वडा नं ४ पकरवास स्थित खोपको जंगलमा बिरामी अवस्थामा चितुवा भएको स्थानीयले जानकारी गराए पछि डिभिजन बन कार्यालय रामेछाप, खाँडादेवी गाउँपालिकाको पशु स्वास्थ्य शाखा र मन्थली नगरपालिकाको पशु स्वास्थ्य शाखाको समन्वयमा नियन्त्रणमा लिएको हो ।
नियन्त्रणमा लिइएको चितुवा भएपनि सुरुमा जंगलमा देख्ने स्थानीयले भने बाघ भएको बताएका थिए । बिरामी अवस्थामा रहेको चितुवालाई नियन्त्रणमा लिएर मन्थली नगरपालिकाको पशु स्वास्थ्य शाखामा उपचार भईरहेको मन्थली नगरपालिकाको पशु स्वास्थ्य शाखाका प्रमुख पशु स्वास्थ्य प्राविधिक मुकुन्द कुमार खड्काले बताउनुभयो । उहाँलका अनुसार बिरामी अवस्थामा रहेको चितुवाको पछाडि पटीको भाग चलेको छैन् । चितुवालाई उपचार पछि नियम अनुसार सम्बन्धित निकायको जिम्मा लगाईने पनि उहाँले बताउनुभयो ।
चितुवा नियान्त्रणमा लिएको खबर पाए पछि उपचारको क्रममा रहेको चितुवाको छेउमा बसेर पहिलो पटक बाघ देखेको बताउँदै सेल्फी खिचाउने स्थानीयको केही बेर भिड समेत लागेको थियो ।
