काठमाण्डौं- उज्यालो नेपाल पार्टीले केन्द्रीय युवा तथा विद्यार्थी विभागको संयोजकमा राज मैनालीलाई मनोनयन गरेको छ । पार्टीको विधान २०७६ (संशोधित) अनुसार अध्यक्ष कुलमान घिसिङको निर्णयअनुसार मैनालीलाई उक्त जिम्मेवारी प्रदान गरिएको हो
पार्टीले मैनालीको सामाजिक क्षेत्रमा देखिएको सक्रियता, संगठनात्मक अनुभव, योग्यता र इमान्दारितालाई आधार मानेर केन्द्रीय तहको जिम्मेवारी सुम्पिएको जनाएको छ । उज्यालो नेपाल पार्टीले उनको नेतृत्वमा युवा तथा विद्यार्थीलाई पार्टीसँग अझ मजबुत रूपमा जोड्न सकिने विश्वास लिएको छ ।
मनोनयन पत्रमा पार्टीलाई थप सशक्त, परिणाममुखी र नागरिक–केन्द्रित बनाउँदै सुशासन, समृद्धि र सामाजिक न्यायसहितको उज्यालो नेपाल निर्माणको साझा यात्रामा मैनालीको भूमिका महत्वपूर्ण हुने उल्लेख गरिएको छ ।
पार्टी अध्यक्ष कुलमान घिसिङले उज्याले नेपाल पार्टी रामेछापको जिल्ला सचिव समेत रहेका मैनालीलाई नयाँ जिम्मेवारीका लागि बधाई दिँदै सफल कार्यकालको शुभकामना व्यक्त गरेका छन् ।
घिसिङले संयोजकमा मनोनयन गरेका मैनाली रामेछापको सुनापती गाउँपालिका–४ का हुन् । उनी सामाजिक सेवाको अग्रमोर्चामा सक्रिय रहँदै आएका छन् । डहु माविबाट प्रारम्भिक शिक्षा हासिल गरेका उनी त्रिभुवन विश्वविद्यालयबाट राजनीतिक शास्त्रमा स्नातकोत्तर हुन् ।
जनआन्दोलनमा युवाको प्रतिनिधित्व गर्दै सहभागी भएका मैनाली त्यसयता सामाजिक रूपान्तरण, विपद् व्यवस्थापन, स्वास्थ्य शिविर तथा राहत–उद्धारका कार्यमा निरन्तर खटिँदै आएका छन् । काभ्रेको मङ्गलटार र नेपालथोकमा सम्पन्न मोतियाबिन्दु आँखा शिविरमा उनी नेतृत्वदायी भूमिकामा सक्रिय रहे, जहाँ पाँच सयभन्दा बढी बिरामीले निःशुल्क उपचार पाए । बीपी राजमार्ग निर्माण तथा सञ्चालनका क्रममा रामेछापका नागरिकको आवतजावत सहज बनाउन घोरेटो बाटो निर्माणदेखि सुनकोशी वारपारका लागि सहयोग जुटाउने कार्यमा उनी सक्रिय रहे । हाल मैनाली सुनापती गाउँपालिका रेडक्रस सोसाइटीका सचिव, नेपाल स्काउट सुनापती गाउँपालिकाका प्रमुख आयुक्त तथा प्रदेशस्तरीय विपद् व्यवस्थापन समितिमा आबद्ध छन् ।
