रामेछाप– नेपाली कांग्रेसका नेता मीन विश्वकर्माले पार्टीभित्रको आन्तरिक विवाद सुल्झाउन र आसन्न निर्वाचनमा जित सुनिश्चित गर्न सहमतिको नयाँ सूत्र अघि सारेका छन् । सभापति शेरबहादुर देउवा निकट मानिने निवर्तमान केन्द्रीय सदस्य एवं प्रचार विभाग प्रमुख विश्वकर्माले पार्टीको आन्तरिक कलहका कारण लोकतन्त्र नै संकटमा पर्न लागेको भन्दै फेसबुका मार्फत नेतृत्वलाई एकजुट हुन आह्वान गरेका हुन् ।
हस्ताक्षर विवादको मध्यमार्गी विकल्प पार्टीभित्र विशेष महाधिवेशन र संस्थापन पक्षबीच देखिएको उम्मेदवारको टिकट हस्ताक्षर सम्बन्धी विवादलाई सुल्झाउन नेता विश्वकर्माले मध्यमार्गी प्रस्ताव गर्दै भनेका छन्, “हिजो उम्मेदवारको टिकटमा कसको हस्ताक्षर हुने भन्ने विवाद थियो, आधामा देउवाले गर्नुभयो, बाँकीमा अब गगन थापाले गर्नुहुन्छ । सबैको सहमतिमा उम्मेदवार चयन गरौँ ।”
उनले न त चौधौँ महाधिवेशनबाट निर्वाचित सभापति देउवा, न त विशेष महाधिवेशनबाट निर्वाचित भनिएका गगन थापा, कसैको पनि एकल निर्णयले मात्र पार्टीले विजय हासिल गर्न नसक्ने फेसबुकमा उल्लेख गरेका छन् ।
अदालतको फैसला पर्खौँ, मैदानमा सँगै जाऔँ विशेष महाधिवेशनको वैधानिकता र निर्वाचन आयोगको भूमिकाप्रति आफ्नो विमति रहेको र यो विषय अदालतमा विचाराधीन रहेको उल्लेख गर्दै नेता विश्वकर्माले झगडालाई अदालतको जिम्मा छाड्न आग्रह गरेका छन् । “झगडा अब अदालतमा छोडौँ, परिणाम जे आउँछ मान्न तयार बनौँ,“ उनले भने, “हिजो भाद्र २४ मा ज्यान बचाउन घर छोड्न तयार भयौँ भने आज पार्टी बचाउन घमण्ड त्याग्न तयार बनौँ ।”
घेराबन्दी तोड्न नेतृत्वलाई आग्रह नेता विश्वकर्माले पार्टीका शीर्ष नेताहरू शेरबहादुर देउवा, गगन थापा, पूर्णबहादुर खड्का र डा. शेखर कोइरालालाई तत्काल एकै ठाउँमा बसेर निर्णय गर्न आग्रह पनि गरेका छन् । नेतृत्वलाई घेराबन्दीबाट बाहिर निस्कन आग्रह गर्दै उनले फागुन २१ को निर्वाचनलाई झगडाको मिलन बिन्दु बनाउनु पर्नेमा जोड दिएका छन् ।
“विवादले थलिएर कांग्रेस उड्नु पर्नेमा दौडन सकेको छैन, दौडन पर्नेमा हिँड्न सकेको छैन र हिँड्नु पर्नेमा घस्रन विवश छ । यो मुलुक र लोकतन्त्रकै लागि दुर्भाग्य हो” उनले भनेका छन् । ऐतिहासिक विरासत बोकेको पार्टीलाई जोगाउन “हिजो पनि रूख, आज पनि रूख, भोलि पनि रूख” भन्ने उत्साहका साथ चुनावी मैदानमा होमिन उनले आम कार्यकर्तालाई आग्रह समेत गरेका छन् ।
