रामेछाप– सुनापति गाउँपालिका वडा नं. ५ भिरकोटमा अवस्थित बाल माध्यमिक विद्यालयले आफ्नो स्थापना कालको ५० वर्ष पूरा गरेको अवसरमा स्वर्णजयन्ती समारोह आयोजना गर्ने भएको छ । विद्यालयले आधा शताब्दी लामो शैक्षिक यात्रालाई स्मरणीय बनाउँदै माघ १० गते शनिवार सामाजिक, शैक्षिक र सांस्कृतिक गतिविधिसहित स्वर्णजयन्ती मनाउन लागेको विद्यालयका प्रधानाध्यापक चक्रबहादुर मानन्धरले जनाकारी दिए ।
स्थापना कालदेखि निरन्तर रूपमा ग्रामीण क्षेत्रमा शिक्षाको ज्योति फैलाउँदै आएको बाल माविले यस अवधिमा सयौँ विद्यार्थीलाई औपचारिक शिक्षासँगै अनुशासन, संस्कार र सामाजिक जिम्मेवारीको पाठ सिकाउँदै आएको प्रधानाध्यापक मानन्धरको भनाइ छ । “स्रोत–साधनको अभाव, भौगोलिक कठिनाइ र विभिन्न चुनौतीबीच पनि विद्यालयले आफ्नो शैक्षिक यात्रालाई निरन्तर अगाडि बढाउँदै यहाँसम्म आइपुगेको छ, यो सम्पूर्ण शिक्षक, अभिभावक, विद्यार्थी र समुदायको सामूहिक योगदानको परिणाम हो,” उनले भने । स्वर्णजयन्ती समारोह सुनापति गाउँपालिकाका अध्यक्ष ठुलोकान्छा तामाङको प्रमुख आतिथ्यतामा सम्पन्न गरिने प्रधानाध्यापक मानन्धरले बताए । समारोहमा विद्यालयको इतिहास, उपलब्धि र योगदानलाई उजागर गर्ने उद्देश्यले विभिन्न कार्यक्रमहरू समावेश गरिएको बालमाविका सहायक प्रधानाध्यापक एवं सूचना अधिकारी माइकल लामाले जानकारी दिए ।
सूचना अधिकारी लामाका अनुसार विद्यालयका जग्गादाता, पूर्व विद्यालय व्यवस्थापन समिति अध्यक्ष, पूर्व शिक्षक–अभिभावक संघ अध्यक्ष, संस्थापक व्यक्तित्वहरू, पूर्व प्रधानाध्यापकहरू, समाजसेवी, सहयोगी दाताहरू, दीर्घकालीन रूपमा सेवा प्रदान गरेका शिक्षक तथा कर्मचारी, वर्तमान विद्यार्थीहरू, स्थायी सेवा पूरा गरेका कर्मचारीहरू तथा विभिन्न क्षेत्रमा उल्लेखनीय योगदान पु¥याएका पूर्व विद्यार्थी र विशिष्ट महानुभावहरूलाई सम्मान गरिने छ ।
त्यसैगरी, समारोहअन्तर्गत शैक्षिक प्रदर्शनी, सांस्कृतिक कार्यक्रम र स्काउटद्वारा विशेष कार्यक्रम प्रस्तुत गरिनेछ ।
विद्यालयले स्थापना कालदेखि हालसम्मको ५० वर्षे यात्रा सुन्दर, सफल र ऐतिहासिक रहेको उल्लेख गर्दै स्वर्णजयन्ती समारोहलाई केवल उत्सव मात्र नभई भावी पुस्ताका लागि प्रेरणाको स्रोत बनाउने लक्ष्य लिएको विद्यालय व्यवस्थापन समितिका अध्यक्ष राजु लामाले बताए । अध्यक्ष लामाले विद्यालयले सम्पूर्ण जग्गादाता, पूर्व पदाधिकारी, शिक्षक, विद्यार्थी, अभिभावक, पूर्व विद्यार्थी, समाजसेवी तथा शिक्षा प्रेमी महानुभावहरूलाई गरिमामय उपस्थितिका लागि सादर अनुरोध गरेका छन् ।
