रामेछाप- रामेछापको सदरमुकाम मन्थलीस्थित सहिद स्मृति बहुमुखी क्याम्पसमा ‘समुदायमा सरकारी वकिल’ कार्यक्रम सम्पन्न भएको छ । जिल्ला सरकारी वकिल कार्यालय रामेछापको आयोजनामा बुधबार उक्त सचेतनामुलक कार्यक्रम सम्पन्न भएको हो । समुदायमा सरकारी वकिल अभियान अन्तर्गत विद्यार्थीहरूलाई सरकारी वकिल कार्यालयको काम, कर्तव्य र क्षेत्राधिकारका बारेमा जानकारी दिने उद्देश्यले कार्यक्रमको आयोजना गरिएको कार्यालयले जनाएको छ ।
कार्यक्रममा जिल्ला सरकारी वकिल कार्यालय रामेछापका जिल्ला न्यायाधिवक्ता लोक बहादुर कटुवाल र सहायक जिल्ला न्यायाधिवक्ता विनिता कपालीले सरकारी वकिलले गर्ने कार्य सम्पादन, मुद्दाको प्रक्रिया र विविध कानुनी प्रावधानका बारेमा विद्यार्थीहरूलाई प्रष्ट पारेका थिए । सो क्रममा विद्यार्थीहरूले सरकारवादी मुद्दा, समाजमा देखिने कानुनी जटिलता र त्यसको समाधानका उपायबारे जिज्ञासा राखेका थिए ।
क्याम्पस प्रमुख डा. भरत कुमार श्रेष्ठले यस्ता कार्यक्रमले विद्यार्थीहरूमा कानुनी चेतना अभिवृद्धि हुने बताए । “समाजमा शान्ति र सुव्यवस्था कायम गर्न हरेक नागरिकलाई देशको नियम कानुनबारे आधारभूत ज्ञान हुन जरुरी छ,” उनले भने । कार्यक्रमलाई आगामी दिनमा रामेछापका ग्रामीण बस्तीहरू सम्म लैजाने लक्ष्य राखिएको सरकारी वकिलको कार्यालयले बताएको छ । सरकारी वकिल र नागरिकबीचको दुरी कम गर्न यो अभियान प्रभावकारी हुने विश्वास लिइएको कार्यालयको भनाई रहेको छ ।
कार्यक्रममा सहायक क्याम्पस प्रमुख रिता दाहाल, क्याम्पसका प्राध्यापकहरू र विद्यार्थीहरूको उपस्थिति रहेको थियो । कार्यक्रम सरकारी वकिल कार्यालयका नासु अजय कुमार कुशवाहाले सहजीकरण गरेका थिए ।
