रामेछाप- रामेछापको रामेछाप नगरपालिका–५ रामपुरमा शुक्रबारदेखि जारी अन्तर वडा खुला पुरुष भलिबल प्रतियोगिताको उपाधि ओखलढुंगाको चम्पादेवी गाउँपालिका–२ ले जितेको छ । आइतबार फाइनल खेलमा रामेछापको रामेछाप नगरपालिका वडा नं ५ रामपुर ए लाई हराउँदै चम्पादेवी-२ ले प्रतियोगिताको उपाधि जितेको हो । प्रतियोगिताको उपाधिसँगै विजेता टिमले ८० हजार नगद पुरस्कार सहित शिल्ड मेडल र प्रमाणपत्र प्राप्त गरेको छ । त्यस्तै उपविजेता बनेको रामपुर ए ले ५० हजार नगद पुरस्कार सहित शिल्ड मेडल र प्रमाणपत्र प्राप्त गरेको छ । यता प्रतियोगिताको तृतीय र सान्त्वनाको लागि भएको प्रतिस्पर्धामा ओखलढुंगाकै चम्पादेवी गाउँपालिका–१ ले रामेछाप नगरपालिका- ४ हिमगंगालाइ पराजित गर्दै तृतीय भएको छ । तृतीय भएको टिमले ३० हजार नगद पुरस्कार सहित शिल्ड मेडल र प्रमाणपत्र प्राप्त गरेको छ । सान्त्वना चित्त बुझाएको हिमगंगाले पनि १० हजार नगद पुरस्कार सहित शिल्ड मेडल र प्रमाणपत्र प्राप्त गरेको छ । त्यसै गरी, प्रतियोगिताका विभिन्न विधामा उत्कृष्ट प्रदर्शन गर्ने ६ जना खेलाडीलाई एक हजारदेखि एक हजार पाँच सय रुपैयाँसम्म नगद पुरस्कारसहित मेडल प्रदान गरिएको थियो । प्रतियोगितामा प्रथम द्वितीय तृतीय र सान्त्वना हुने टिम र उत्कृष्ट हुने खेलाडीहरूलाई रामेछाप नगरपालिका वडा नं ५ का वडाध्यक्ष हरिश्चन्द्र श्रेष्ठले पुरस्कार प्रदान गरेका थिए । पुरस्कार वितरण गर्दै वडाध्यक्ष श्रेष्ठले एक दर्जन भन्दा बढी टिमले खेलमा सहभागिता जनाउँदै अनुशासित रूपमा खेल प्रदर्शन गरेर वडाको खेल क्षेत्रमा सहयोग पुर्याउने सबै खेलाडीलाई धन्यवाद दिए । उनले वडा कार्यालयले आगामी दिनमा पनि यस्ता प्रतियोगिता सञ्चालन गर्ने प्रतिबद्धता जनाएका छन् ।
रामेछाप जिल्लाको रामेछाप नगरपालिका वडा नं ५ रामपुरको आर्थिक सहयोग तथा सुनकोशी सामुदायिक सिकाइ केन्द्र रामपुरको आयोजनामा भएको खेलमा रामेछाप ओखलढुंगा लगायतका गरी १३ टिमले सहभागिता जनाएको खेल संयोजक टंकराज श्रेष्ठले बताए ।
