रामेछाप– उज्यालो नेपालका अभियन्ता एवं नेपाल सरकारका ऊर्जा जलस्रोत तथा सिंचाइ मन्त्री कुलमान घिसिङले अब पुराना पार्टी आफ्नै कारणले पाखा लाग्ने अवस्था रहेको बताएका छन् । पचहत्तर वर्ष पुरानो भइसकेको काङ्ग्रेस र कम्युनिस्ट पार्टीले देश विकासको कुनै थिति बसाल्न नसकेको कारण अब उनीहरूको कुनै औचित्य नरहेको बताए । भारत र चीनमा २००७ सालकै आसपास राजनीतिक परिवर्तन भएको उल्लेख गर्दै ती देशको नेतृत्वले विकासको जग बसालेका कारण दुबै देशको विकासमा कायापलट भएको उल्लेख गरे तर नेपालमा भने राजनीति नेतृत्वमा भिजन नभएको कारण मुलुकले गरिबी र अभाव भोग्नु परेको उनले बताए ।
नेपाली जनतालाई पार्टी भन्दा आर्थिक उन्नति चाहिएको उनको भनाइ थियो । अब हुने चुनाबाट पुराना पार्टी पाखा लाग्ने बताए । 󠆐“सही व्यक्ति, सही ठाउँमा सही समयमा हुनुपर्छ अनि देश विकास हुन्छ”, मन्त्री घिसिङको भनाइ थियो । त्यही कार्य पुराना दलले नगरेकोले उनीहरू नाजवाफ भएको बताए । देशमा चुनावको वातावरण बनेको उल्लेख गर्दै उनले फागुन २१ गते हुने प्रतिनिधिसभाको चुनावमा नयाँ शक्तिको बहुमत आउने दाबी समेत गरे । उनले नयाँ राजनीतिक शक्तिहरू एक भएर चुनावमा जाने खुलासा गरे । उज्यालो नेपाल पार्टीका संरक्षक समेत रहेका मन्त्री घिसिङले यो पार्टी स्थापना भएको केही महिना भित्रै मेची महाकाली सम्म फैलिसकेको बताए । पार्टीको गतिविधि गर्ने कमिटी नबन्दै जनस्तरबाटै व्यापक समर्थन आउन थालेकोमा उनले खुसी व्यक्त गरे । “जनताको विश्वासले परिवर्तन आउँछ हामी परिवर्तन संस्थागत गरेरै छाड्छौँ”, मन्त्री घिसिङले भने ।
यस अघि भएको जेनजी आन्दोलन लामो समयको राजनीतिक निराशा र आक्रोशको विस्फोट भएको उनको भनाई रहेको छ । मन्त्री भएपछि पहिलो पटक आफ्नो जिल्लाको सदरमुकाम आएका मन्त्री घिसिङले रामेछापमा पनि उज्यालो नेपाल पार्टी मजबुत हुने विश्वास व्यक्त गरे ।
