रामेछाप- ऊर्जा, जलस्रोत तथा सिँचाइ मन्त्री कुलमान घिसिङलाई मन्थलीका सामुदायिक विद्यालयहरूले विद्युत महसुल निःशुल्क गरिदिन माग गरेका छन् । मन्त्री घिसिङ सहभागी एक कार्यक्रममा मन्थली नगरपालिकाभित्रका ६५ वटा सामुदायिक विद्यालयका प्रधानाध्यापकहरूले हस्ताक्षरसहितको मागपत्र बुझाएका हुन् ।
प्रधानाध्यापकहरूले बुझाएको मागपत्रमा सामुदायिक विद्यालयहरूको सञ्चालन र व्यवस्थापन शीर्षकमा न्यून बजेट विनियोजन हुने गरेको उल्लेख गरिएको छ । शिक्षालाई सूचना तथा सञ्चार प्रविधिसँग जोड्दै गुणस्तरीय शिक्षाको पहुँच र प्रयोगलाई निरन्तरता दिन विद्युतको खपत बढ्दै गएको, तर विद्यालयसँग महसुल भुक्तानी गर्ने पर्याप्त स्रोत नभएकाले निःशुल्क गरिदिन माग गरिएको हो ।
सामुदायिक विद्यालयका तर्फबाट दिइएको उक्त मागपत्र बुझ्दै मन्त्री घिसिङले विद्यालयहरूले भोग्नुपरेको समस्या र मर्काका बारेमा आवश्यक छलफल गर्ने प्रतिबद्धता जनाएका छन् ।
