रामेछाप– २२औँ महिला सामुदायिक स्वास्थ्य स्वयंसेविका दिवसको अवसरमा सुनापति गाउँपालिका–१ गुन्सीका स्वास्थ्य स्वयंसेविका सम्मानित भएका छन् । वडा कार्यालयको आयोजनामा सम्पन्न २२औँ महिला सामुदायिक स्वास्थ्य स्वयंसेविका दिवसको अवसरमा वडामा रहेका १६ जना स्वयंसेविकालाई सम्मान गरिएको हो । स्वयंसेविकालाई दोसल्ला ओढाएर सम्मान गर्नुको साथै झोला, डायरी, कलम र छाता समेत वितरण गरिएको वडा कार्यालयले जनाएको छ । वडा अध्यक्ष ध्रुब प्रसाद चौलागाईको अध्यक्षता तथा गाउँपालिका उपाध्यक्ष गीता बिष्टको प्रमुख आतिथ्यतामा कार्यक्रम सम्पन्न भएको थियो ।
कार्यक्रममा गाउँपालिका उपाध्यक्ष गिता विष्ट, वडाध्यक्ष ध्रुब प्रसाद चौलागाई, कार्यपालिका सदस्य रीता धमला, स्थानीय इन्द्रमणि चौलागाई, सोम प्रसाद सापकोटा, भीष्म राज चौलागाई, देवी प्रसाद गौतम, डोल कुमारी तिमलसिना लगायतले शुभकामना मन्तव्य व्यक्त गरेका थिए । वक्ताहरूले महिला स्वास्थ्य स्वयंसेविकाले गाउँ–समुदायमा पुर्याउँदै आएको सेवा, योगदान र सक्रियताप्रति धन्यवाद व्यक्त गर्दै निरन्तर स्वास्थ्य सेवा प्रवर्द्धनमा लागिरहन आग्रह गरेका थिए ।
