रामेछाप- रामेछापको सुनापति गाउँपालिकाले चौथो सुनापति गाउँपालिका अध्यक्ष कप खुला पुरुष भलिबल प्रतियोगिता कात्तिक ९ गतेदेखि सुरु गर्ने भएको छ । गाउँपालिकाले खुला पुरुष भलिबल प्रतियोगितामा देशैभरका भलिबल खेलाडीले भाग लिन पाउने गरी कात्तिक ९ गतेबाट सुरु गरेर १२ गते सम्पन्न गर्ने मिति तय गरेको हो ।
गाउँपालिका भित्र रहेका खेलाडीलाई राष्ट्रिय स्तरको खेलाडीहरूसँग प्रतिस्पर्धा गराउने र आन्तरिक पर्यटक भित्र्याउने मुख्य उद्देश्य सहित प्रतियोगिता आयोजना गर्न लागिएको सुनापति गाउँपालिकाका अध्यक्ष ठुलोकान्छा तामाङले बताए ।
विगतदेखि नियमित संचालन हुँदै आएको गाउँपालिका अध्यक्ष कपलाई यो पटक भने देशैभरका भलिबल खेलाडीको (विभागीय टिम बाहेक) सहभागिता हुने गरी खुल्ला पुरुष भलिबल प्रतियोगिताको आयोजना गर्न लागिएको सुनापति गाउँपालिका खेलकुद विकास समितिका अध्यक्ष सुदिप केसीले बताए । अध्यक्ष केसीका अनुसार प्रतियोगितामा भाग लिने भलिबल टिमले कात्तिक ७ गते सम्ममा आफ्नो टिम दर्ता गराइसक्नु पर्ने छ । टिम दर्ता गर्नको लागि कुनै पनि शुल्क नलाग्ने अध्यक्ष केसीले बताए ।
सुनापति गाउँपालिका खेलकुद विकास समितिको आयोजनामा हुने प्रतियोगिताको प्रथम हुने टिमले १ लाख ५० हजार, दोस्रो हुने टिमले १ लाख, तेस्रो हुने टिमले ५० हजार र सान्त्वना हुने टिमले २५ हजार रुपैयाँ पुरस्कार जित्ने छन् । त्यसै गरी उत्कृष्ट खेलाडीले नगद ५ हजार पुरस्कार पाउने छ ।
टिम दर्ता गर्न वा खेल सम्बन्धी कुनै विषयको जानकारी लिनु परेमा भुवन लामा (९७६१८४२६६५), सोम तितुङ (९८६०२८५३३९), दिनेश नेपाली (९८५१३२९१४९), विशाल लामा (९८६४१२३१६२) र बुद्ध तितुङ (९८४९५७७०२१) सँग सम्पर्क गर्न खेलकुद विकास समितिले बताएको छ ।
