रामेछाप- सुनापति गाउँपालिकाले हरितालिका तिजको अवसर पारेर आयोजना गरेको गाउँपालिका स्तरीय लोकगीत प्रतियोगितामा वडा नं २ को दिदीबहिनी समूह प्रथम भएको छ । आइतबार गाउँपालिमा आयोजित प्रतियोगितामा विभिन्न समूहलाई पछाडि पार्दै वडा नं २ को दिदीबहिनी समूह प्रथम भएको हो । त्यस्तै वडा नं ४ को आमा समूह द्वितीय, वडा नं ५ को सचेतना आमा समूह तृतीय, वडा नं १ को चेतनशील समूह चौथो र सयपत्री आमा समूह सान्त्वना भएको छ ।
प्रतियोगितामा प्रथम हुने दिदीबहिनी समूहले नगद १५ हजार, द्वितीय हुने आमा समूहले नगद १० हजार, तृतीय हुने सचेतना आमा समूहले नगद ५ हजार र चौथो हुने चेतनशील समूहले नगद ३ हजार पुरस्कार प्राप्त गरेका छन् ।
प्रतियोगितामा प्रथम, द्वितीय, तृतीय र सान्त्वना हुने प्रतियोगी समूहहरूलाई कार्यक्रमका प्रमुख अतिथि समेत रहेका सुनापति गाउँपालिकाका अध्यक्ष ठुलोकान्छा तामाङले बधाई दिँदै पुरस्कार प्रदान गरेका थिए । कार्यक्रममा आफ्नो भनाई राख्दै अध्यक्ष तामाङले तिजको अवसर पारेर राखेको प्रतियोगिताले चाड पर्वको संरक्षण र संस्कृतिको जगेर्ना गर्न मद्दत पुग्ने विश्वास व्यक्त गरे ।
गाउँपालिका उपाध्यक्ष गिता विष्टको अध्यक्षतामा भएको कार्यक्रममा सबै वडाबाट प्रतियोगितामा विभिन्न समूहको सहभागिता रहेको थियो । उपाध्यक्ष विष्टले प्रतियोगितामा महिला दिदीबहिनीहरूको सक्रिय सहभागिताले महिला सशक्तीकरणमा सहयोग पुगेको भनाइ राखिन् ।
कार्यक्रममा सबै वडाका वडाध्यक्ष, गाउँपालिका तथा वडा तहका महिला कर्मचारी लगायत स्थानीय महिलाहरूको सहभागिता रहेको सुनापति गाउँपालिकाका प्रमुख प्रशासकीय अधिकृत सुरेश कुमार श्रेष्ठले बताए । कार्यक्रममा विभिन्न सांस्कृतिक कार्यक्रम समेत गरिएको बताइको छ ।
