रामेछाप- महिलाहरूको महान् पर्व हरितालिका तीजको अवसर पारेर सुनापति गाउँपालिकाले पालिका स्तरीय लोकदोहोरी प्रतियोगिता आयोजना गर्ने भएको छ । गाउँपालिकाले पालिकाका सबै वडालाई सहभागी गराउँदै भदौ ८ गते गते प्रतियोगिताको आयोजना गर्ने तयारी गरेको हो ।
प्रतियोगितामा सहभागी हुन प्रत्येक वडाबाट महिला समूहले कम्तीमा सात जनाको टोली बनाएर दर्ता गराउनुर्पे गाउँपालिकाले जनाएको छ । प्रस्तुत गरिने गीतहरू तीज पर्वको सांस्कृतिक महत्त्व र सामाजिक शालीनताको ख्यालमा आधारित हुनुपर्ने, समाजमा साम्प्रदायिक भावना फैलाउने, अश्लील शब्द प्रयोग गर्ने वा अपमानजनक गीतहरू प्रस्तुत गर्न नपाइने जस्ता नियमहरु राखिएको गाउँपालिकाका प्रमुख प्रशासकीय अधिकृत सुरेश कुमार श्रेष्ठले बताए ।
प्रतियोगितामा विजेताहरूलाई आकर्षक पुरस्कारको व्यवस्था गरिएको छ । पहिलो स्थान हासिल गर्ने समूहले १५ हजार रुपैयाँ प्राप्त गर्नेछ भने दोस्रो हुने समूहले १० हजार रुपैयाँ हात पार्नेछन् । त्यस्तै तेस्रो हुने समूहलाई ५ हजार रुपैयाँ र सान्त्वना स्वरूप सहभागी समूहलाई ३ हजार रुपैयाँ प्रदान गरिनेछ ।
दर्ता प्रक्रियाका लागि समूहको नाम, सदस्यको विवरण र गीतको शीर्षक लेखी प्रतिस्पर्धामा सहभागी हुन सकिने जनाइएको छ । एक समूहमा ५ देखि ७ जनाको सहभागी गराउनु पर्ने पनि सूचनामा उल्लेख गरिएको छ ।
