रामेछाप– लिखुतामाकोशी गाउँपालिकाले पालिका भित्रका सबै वडामा पुगेर दलित समुदायलाई राज्यले दिँदै आएका विभिन्न छुट, सहुलियत र विशेष सुविधाको बारेमा गाउँ गाउँमा पुगेर अभिमुखीकरण गरेको छ । गाउँपालिकाको चालु आर्थिक वर्षको दलित लक्षित कार्यक्रम अन्तरगत मागमा आधारित दलित सशक्तीकरण तथा आयआर्जन कार्यक्रमबाट वडा तहमै पुगेर स्थानीय सरकार, प्रदेश सरकार, संघीय सरकार र विभिन्न निकायबाट दलित समुदायले पाउने विभिन्न छुट, सहुलियत र विशेष सुविधाको बारेमा अभिमुखीकरण गरेको हो । गाउँपालिकाको आर्थिक सहयोगमा गुगल व्यावसायिक कन्सल्टेन्सी प्रा.लिले वडाको दलित बस्तीमै पुगेर सबै वडामा एक÷एक दिने अभिमुखीकरण गरिएको गाउँपालिकाले बताएको छ ।
“राज्यबाट दलित समुदायलाई विभिन्न छुट सहित सहुलियत र विशेष सुविधाहरू छन्, उहाँहरूलाई त्यस्ता सेवा र सुविधाको बारेमा जानकारी नहुँदा राज्यले प्रदान गर्ने धेरै अवसरबाट दलित समुदाय वञ्चित हुनु परेको छ । त्यस कारण पनि उहाँहरूको जनचेतनामा वृद्धि गर्दै त्यस्ता सुविधाको अधिकतम प्रयोग गर्न सहयोग पुग्ने उद्देश्य सहित वडा तहमै अभिमुखीकरण कार्यक्रम गरिएको हो,” गाउँपालिका अध्यक्ष केशव महतले भने ।
गाउँपालिकाको वडा नं १ मा वडाध्यक्ष प्रदिप कुमार तामाङ, वडा नं २ मा वडाध्यक्ष सन्तोष पौडेल, वडा नं ३ मा गोपाल तामाङ, वडा नं ४ वडाध्यक्ष दिपक पुलामी, वडा नं ५ मा रोम बहादुर तामाङ, वडा नं ६ मा वडाध्यक्ष शिव प्रसाद न्यौपाने र वडा नं ७ मा वडाध्यक्ष कल्पना पाण्डेको अध्यक्षतामा अभिमुखीकरण गरिएको गुगल व्यावसायिक कन्सल्टेन्सी प्रा.लिका प्रबन्ध निर्देशक गम्भिरराज दंगालले बताए । दंगालका अनुसार वडामा गरिएको अभिमुखीकरण कार्यक्रममा वडा, गाउँपालिका, प्रदेश र संघीय सरकारका विभिन्न निकायबाट दलित समुदायलाई पाउने छुट, सहुलियत र विशेष सुविधाहरू कस्ता छन् र त्यस्ता सुविधाहरू कसरी लिन सकिन्छ भन्ने जस्ता विषयको बारेमा जानकारी गराइएको छ ।
त्यस्तै वडा वडाबाट दलित समुदायले राखेका विभिन्न समस्याका बारेमा गाउँपालिकामा सबै वडाका दलित अगुवाहरूको समेत सहभागिता हुने गरी दलितका सवालमा केन्द्रित साझा सवाल कार्यक्रम मार्फत सरोकारवालाहरूसँग बसेर समाधानको प्रयास समेत गरिएको थियो । साझा सवाल कार्यक्रममा राष्ट्रिय दलित आयोगका सदस्य सुन्दर पुर्कुटी, गाउँपालिका अध्यक्ष केशव महत, उपाध्यक्ष दिपा पाख्रिन, नेपाल प्रहरीका प्रहरी निरीक्षक विक्रम खड्का मगर, नेपाल पत्रकार महासंघ रामेछापका अध्यक्ष दिपक कुमार घिमिरे, गाउँपालिकाका वडाध्यक्षहरू, कार्यपालिका सदस्य लगायतले सवालमा उठाएका विभिन्न विषयका बारेमा जवाफ दिँदै दलित समुदायको सशक्तीकरणको लागि आ–आफ्नो ठाउँबाट सहयोग गर्ने प्रतिबद्धता समेत जनाएका छन् ।
दलित लक्षित कार्यक्रम अन्तरगत नै मागमा आधारित दलित समुदायको आयआर्जनलाई समेत थप सहयोग पुग्ने गरी १० जना दलित उद्यमीहरूलाई उनीहरूको माग र आवश्यकताको आधारमा विभिन्न सामाग्री निःशुल्क उपलब्ध गराइएको गाउँपालिकाका प्रमुख प्रशासकीय अधिकृत रामसिं डडालले बताए । उनका अनुसार यसरी सामाग्री पाउनेहरूमा गाउँपालिका र उद्योग तथा वाणिज्य कार्यालय रामेछापमा दर्ता भई सञ्चालनमा रहेका उद्योगीहरू रहेका छन् ।
