रामेछाप– रामेछाप जिल्लाको सुनापति गाउँपालिकाले हरियाली प्रवर्द्धन र वातावरणीय सन्तुलन कायम गर्न उल्लेखनीय कदम चालेको छ । गाउँपालिकाको प्रमुख पर्यटकीय क्षेत्रका रूपमा परिचित लामा टोलदेखि सुनापति डाँडाको शिवमूर्ति वरिपरी हुँदै १०८ वटा लहरे माने सम्म पुग्ने सडक छेउछाउ करिब दुई हजार बढी बिरुवाहरू रोपिएको गाउँपालिकाले जानकारी दिएको छ ।
धान दिवसका रूपमा मनाइने असार १५ को अवसर पारेर गरिएको उक्त वृक्षारोपण कार्यक्रमको नेतृत्व गाउँपालिका अध्यक्ष ठुलोकान्छा तामाङले गरेका थिए । उनीसँगै वडाध्यक्षहरू, विभिन्न वडाका जनप्रतिनिधि, कर्मचारी तथा स्थानियवासीहरूको समेत उल्लेखनीय सहभागिता रहेको थियो ।
कार्यक्रममा धुपी, आलुचा, कपुर, अम्ब, मलगेडी, चाइनिज लालिगुराँस जस्ता विभिन्न बहुपयोगी, सास्कृतिक, औषधीय र आकर्षक प्रजातिका बिरुवाहरू रोपिएको हो । यस्ता बिरुवाहरूले वातावरणीय सन्तुलन कायम गर्नुका साथै पर्यटकीय सौन्दर्य अभिवृद्धिमा समेत महत्वपूर्ण भूमिका खेल्ने विश्वास गरिएको छ।
सुनापति गाउँपालिकाको केन्द्रबाट १०८ वटा लहरे मानेसम्म पुग्ने सडक निर्माणका क्रममा केही जंगल नष्ट भएको अवस्थामा सो क्षतिलाई न्यूनीकरण गर्न पनि यो वृक्षारोपण गरिएको अध्यक्ष तामाङले बताए । उनले भने,“सडक विकाससँगै हामीले पर्यावरणीय सन्तुलन पनि कायम राख्नुपर्छ भन्ने सोचका साथ हामीले वृक्षारोपणलाई प्राथमिकतामा राखेका छौं ।”
उनका अनुसार अहिले लगाइएका बिरुवाहरूमा बहुसंख्यक चिरपरिचित सजावटी र औषधीय महत्वका छन्, जसले आगामी केही वर्षभित्रै पर्यटकहरूको ध्यान तान्ने खालको वातावरण बनाउनेछ। “हामीले केवल विकास मात्र हैन, दिगो विकास र हरित विकासको अवधारणा अनुरूप काम गरिरहेका छौं,” अध्यक्ष तामाङले भने ।
लामा टोलदेखि लहरे मानेसम्मको सडक मार्ग आफैँमा एक प्राकृतिक पदमार्ग जस्तै बनेको छ । लहरे माने डाँडँबाट रामेछाप र आसपासका जिल्लाको रमणीय ठाउँको समेत अवलोकन गर्न सकिन्छ । यस क्षेत्रमा हुने सिजनअनुसारको हुस्सु, हिमपात, र वसन्त ऋतुमा फुल्ने विभिन्न प्रजातिका फुलले नै पर्यटकलाई लोभ्याउने गर्छन् । यस्ता क्षेत्रमा हरियाली थपिनुले निश्चय नै पर्यटक आकर्षणमा टेवा पुर्याउने विश्वास स्थानीयको छ ।
गाउँपालिका अध्यक्ष तामाङले अब प्रत्येक वर्ष निरन्तर वृक्षारोपणलाई प्राथमिकतामा राख्ने र रोपिएका विरुवाको संरक्षणका लागि स्थानीय समुदायसँग सहकार्य गर्दै नियमित अनुगमन प्रणाली लागू गरिने बताए ।
