रामेछाप- नेपाल तरुण दल रामेछापले अधिवेशन गर्नको लागि प्रारम्भिक छलफल तथा कार्यक्रमहरू तय गरेको छ । शनिवार बसेको जिल्ला कार्यसमितिको बैठकले आगामी अधिवेशनको पुर्वतयारी स्वरूप तरुण दलको पूर्णकालीन सदस्यता नवीकरण र नयाँ सदस्य वितरणको निर्णय गरेर अधिवेशनको तयारी गरेको हो ।
नेपाल तरुण दल रामेछापका अध्यक्ष काजी बहादुर खड्का (दिनेश) को अध्यक्षतामा बसेको बैठकले तरुण दलको पूर्णकालीन सदस्यता नवीकरण गर्ने र नयाँ सदस्यता वितरणको निर्णय गरिएको नेपाल तरुण दल रामेछापका उपाध्यक्ष जीवन कार्कीले जानकारी दिए । उपाध्यक्ष कार्कीले भने,“नेपाल तरुण दल रामेछाप अब अधिवेशनमा लागेको छ । त्यसको लागि सबै भन्दा सुरुका कामहरू भनेको सदस्यता नवीकरण र नयाँ वितरण हो । त्यसको लागि तरुण दलको विधान अनुसार दुवै काम सुरु गर्ने निर्णय गरेका छौँ । त्यसपछि अधिवेशन गर्नु भन्दा अगाडि गर्नु पर्ने अरू बाँकी कामहरू गरेर अधिवेशन गर्नेछौँ ।”
तरुण दलका अध्यक्ष खड्का गोकुलगंगा गाउँपालिकाको अध्यक्ष समेत भएकाले नेपाल तरुण दलको अधिवेशनको लागि भनेजति समय दिन नसक्ने हुँदा उपाध्यक्ष द्वोय बासु फुयाल र जीवन कार्की, समितिका पदाधिकारी तथा कार्यसमितिका सदस्यहरुलाई सबै तरुणसँग समन्वय गरेर अगाडि बढ्न विभिन्न जिम्मेवारी समेत दिएको बैठकमा सहभागी एक सदस्यले जानकारी दिए ।
मुख्य गरी सदस्यताको काम सम्पन्न भएपछि अधिवेशनको मिति अर्को बैठकले तोक्ने तयारी भएको बताइएको छ ।
