रामेछाप- रामेछाप नगरपालिकाका सबै वडा बालमैत्री स्थानीय शासनयुक्त वडा घोषणा भएका छन् । मंगलबार नगरका सबै वडामा औपचारिक कार्यक्रमको आयोजना गरि ९ ओटै वडा बालमैत्री स्थानीय शासनयुक्त वडा घोषणा गरिएको हो । बालमैत्री शासन प्रणाली स्थापनाका लागि सबै वडाहरूले बाल बचाउ १४, बाल संरक्षण १०, बाल विकास ६, बाल सहभागिता ६ र संस्थागत विकास १५ गरी जम्मा ५१ वटा सूचकहरू पुरा भएपछि नगरका सबै वडा एकै पटक बालमैत्री स्थानीय शासनयुक्त वडा घोषणा गरिएको नगर प्रमुख लवश्री न्यौपानेले बताए ।
जिल्ला समन्वय समिति रामेछापले अनुगमन गरेपछि ९ ओटै वडाहरूमा बालमैत्री स्थानीय शासनयुक्त वडा हुनको लागि आवश्यक पर्ने सबै सुचकहरु पुरा भएको जानकारी गराएको थियो ।
वडा नं ७ सुकाजोरमा पुर्व राज्यमन्त्री एवं प्रतिनिधि सभा सदस्य पुर्ण बहादुर तामाङ (कान्छाराम), वडा नं ९ ल्याङल्याङमा बागमती प्रदेश सभा सदस्य तारानारायण श्रेष्ठ, वडा नं ४ हिमगंगामा नगर प्रमुख लवश्री न्यौपाने, वडा नं २ देउरालीमा जिल्ला समन्वय समितिका उपप्रमुख प्रेमसागर थापा, वडा नं ६ ओख्रेनीमा प्रमुख जिल्ला अधिकारी श्यामकृष्ण थापा, वडा नं ५ रामपुरमा जिल्ला समन्वय अधिकारी हरिकृष्ण फुयाल, वडा नं ३ साँघुटारमा रामेछाप नगरपालिकाका प्रमुख प्रशासकीय अधिकृत भोलाप्रसाद चापागाईं, वडा नं ८ रामेछापमा शिक्षा समन्वय इकाई रामेछापका प्रमुख नेत्र प्रसाद गजुरेल र वडा नं १ गोठगाउँमा रामेछाप नगरपालिकाको निवर्तमान उपप्रमुख सृजना खड्काको प्रमुख आतिथ्यमा बालमैत्री स्थानीय शासनयुक्त वडा घोषणा गरिएको रामेछाप नगरपालिकाका प्रवक्ता समिर कार्कीले बताए ।
बालमैत्री वडा घोषणा हुनुभन्दा पहिले पुरा गर्नु पर्ने ५१ वटा सुचकहरु पुराभएको प्रतिवेदन सम्बन्धित वडाका वडाध्यक्षहरुले प्रस्तुत गरेका थिए । वडाध्यक्षले प्रतिवेदन प्रस्तुत गरेपछि सयौँको सङ्ख्यामा सहभागी स्थानीय नागरिकहरुको सहभागितामा प्रमुख अतिथिले बालमैत्री स्थानीय शासनयुक्त वडा घोषणा गरेका थिए ।
नगरका सबै वडा बालमैत्री स्थानीय शासनयुक्त वडा घोषणा भइसकेको र अब बालमैत्री स्थानीय शासनयुक्त नगरपालिका घोषणाको तयारीमा लाग्ने रामेछाप नगरपालिकाका प्रमुख प्रशासकीय अधिकृत भोलाप्रसाद चापागाईले बताए ।
रामेछापमा ८ स्थानीय तहका ६४ वडा मध्ये रामेछाप नगरपालिकाका ९ वटा वडा बालमैत्री स्थानीय शासनयुक्त वडा घोषणा भएसँगै जिल्लामा पहिलोपटक बालमैत्री स्थानीय शासनयुक्त वडा घोषणा हुने ९ वटा वडा पहिलो भएका छन् ।
