रामेछाप– गृह मन्त्रालयले गरेको कार्यसम्पादन मूल्याङ्कनमा जिल्ला प्रशासन कार्यालय रामेछाप पहिलो भएको छ । चालु आर्थिक वर्ष २०८१/०८२ को तेस्रो त्रैमासिक अवधि (माघ–चैत्र) को सम्पादित कार्यहरूका आधारमा रामेछाप जिल्ला प्रशासनले पहिलो स्थान प्राप्त गरेको हो ।
मन्त्रालयले प्रत्येक आवको त्रैमासिक कार्य मूल्याङ्कनका आधारमा प्रतिवेदन सार्वजनिक गर्ने गरेको छ । शान्तिसुरक्षा र अपराध नियन्त्रण, शासकीय प्रबन्ध (सेवा प्रवाह र सुशासन), लागूऔषध र नियन्त्रण, विपद् जोखिम न्यूनीकरण व्यवस्थापन, मुआब्जा वितरण तथा विकास सहजीकरणलगायतका विषयलाई आधार मानी जिल्ला प्रशासनका विभिन्न सूचकहरूमा मूल्याङ्कन गर्ने गर्छ ।
गृह मन्त्रालयले सार्वजनिक गरेको कार्यसम्पादनको तालिका अनुसार कूल १८ दशमलव ५ पूर्णाङ्क मध्ये रामेछापले १८ दशमलव १२५ अंक प्राप्त गरेको छ । सो अवधिमा रामेछाप प्रशासनले अपलोड गरेको ५३ मध्ये ५२ वटा विवरण स्वीकृत भएको थियो ।
गएको दोस्रो त्रैमासिक (कार्तिक–पौष) मा पनि रामेछाप जिल्ला दोस्रो भएको थियो । दोस्रो त्रैमासिकमा गृह मन्त्रालयले सार्वजनिक गरेको कार्यसम्पादनको तालिका अनुसार कूल २० पूर्णाङ्क मध्ये रामेछापले १९ दशमलव ३७५ अंक प्राप्त गरेको गर्दै दोस्रो भएको थियो ।
चालु आर्थिक वर्षको दुवै त्रैमासिकको अवधिमा रामेछापको प्रमुख जिल्ला अधिकारीमा राजु प्रसाद पौडेल रहेका थिए । उनले सार्वजनिक कार्यक्रमहरूमा आफ्नो भनाइ राख्ने क्रममा जिल्ला प्रशासनबाट हुने कार्यलाई नागरिकमैत्री बनाउँदै कार्यसम्पादनलाई थप गुणस्तरीय बनाउने प्रतिबद्धता जनाउने गरेका थिए । छोटो समय रामेछाप बसेर गृह मन्त्रालयले गर्ने मूल्याङ्कनमा रामेछापलाई पहिलो बनाउने पौडेल हाल गृह मन्त्रालयमा कार्यरत छन् । हाल रामेछापको प्रमुख जिल्ला अधिकारीमा श्यामकृष्ण थापा रहेका छन् ।
