रामेछाप- रामेछाप प्रादेशिक अस्पतालले सार्वजनिक वित्तीय व्यवस्थापनमा उल्लेखनीय सफलता हात पारेको छ । महालेखापरीक्षकको कार्यालयले सार्वजनिक गरेको आर्थिक वर्ष २०८०/०८१ को वार्षिक प्रतिवेदनअनुसार अस्पतालको बेरुजु रकम शून्य देखिएको छ । महालेखापरीक्षकको ६२ औं प्रतिवेदनअनुसार उक्त वर्ष अस्पतालमा ९ करोड २४ लाख ९१ हजार रुपैयाँको लेखापरीक्षण गरिएको थियो । यति ठूलो रकमको लेखाजोखा हुँदाहुँदै पनि कुनै आर्थिक अनियमितता नदेखिनु अस्पताल प्रशासनको सुशासन र पारदर्शिताको प्रमाण हो । अघिल्लो आर्थिक वर्ष २०७९/०८० मा पनि अस्पतालको बेरुजु शून्य थियो, जसले दुई वर्षदेखि निरन्तर पारदर्शी आर्थिक अभ्यास भइरहेको पुष्टि गरेको छ ।
अस्पताल व्यवस्थापन तथा सञ्चालन समितिका अध्यक्ष यमकुमार पाख्रिनले नेतृत्वकर्ताको सोच, प्रतिबद्धता र पारदर्शी कार्यशैलीले यस्तो उपलब्धि सम्भव भएको बताए । उनले भने, “यदि कुनै पनि सार्वजनिक निकायका नेतृत्वले नागरिक र सुशासनप्रति उत्तरदायी भएर काम गरे, हरेक प्रक्रिया पारदर्शी बनाइयो भने त्यस संस्थाको मूल्यांकन सकारात्मक हुन्छ । रामेछाप अस्पताल त्यसको जीवित उदाहरण हो ।”
निमित्त मेडिकल सुपरिटेन्डेन्ट डा. केशव श्रेष्ठले पनि आर्थिक शुद्धता र सेवा प्रवाहमा पारदर्शिता नै प्रमुख कारण भएको बताए । “हामी हाम्रा हरेक गतिविधिबारे जानकारी दिन सधैं तयार छौं । राज्यका कुनै पनि निकायबाट मूल्यांकन हुँदा स्पष्ट विवरण दिन सक्ने अवस्थामा छौं,” उनले भने, “त्यसैले हाम्रा सेवा र आर्थिक गतिविधि दुवै क्षेत्रमा मितव्ययिता कायम गर्न सफल भएका छौं ।”
रामेछाप अस्पतालले यसअघि पनि उल्लेखनीय सफलता हात पारेको थियो । बागमती प्रदेशअन्तर्गत रहेका ५० शैयाका प्रादेशिक अस्पतालमध्ये ८९ प्रतिशत अंक प्राप्त गर्दै प्रदेशभर दोस्रो स्थान हासिल गरेको थियो ।
अस्पतालले हाल सामान्य रोगको उपचारदेखि जटिल शल्यक्रिया सेवा समेत प्रभावकारी ढंगले प्रदान गर्दै आएको छ । पूर्वाधार सुधार, जनशक्ति व्यवस्थापन र सेवा विस्तारसँगै यहाँका स्वास्थ्य सेवा नागरिकमैत्री बन्दै गएका छन् ।
