रामेछाप- कर्मचारी मिलन केन्द्र रामेछाप र लेखा समूह रामेछापले संयुक्त रुपमा नयाँ वर्षको शुभकामना आदानप्रदान तथा २०८२ सालको भित्ते पात्रो तथा टेबुल पात्रो सार्वजनिक गरेका छन् । बुधवार एक कार्यक्रमको आयोजना गरी रामेछाप जिल्लामा कार्यरत सरकारी कर्मचारीहरू बिचमा २०८२ सालको शुभकामना आदानप्रदान सँगै कर्मचारी मिलन केन्द्र रामेछापद्वारा प्रकाशित भित्ते पात्रो र लेखा समूह रामेछापद्वारा प्रकाशित २०८२ सालको टेबुल पात्रो सार्वजनिक गरिएको हो । कर्मचारी मिलन केन्द्रका संरक्षक समेत रहेका रामेछापका प्रमुख जिल्ला अधिकारी राजु प्रसाद पौडेलको अध्यक्षतामा भएको कार्यक्रममा जिल्ला स्थित सरकारी कार्यालयका प्रमुख लगायतका कर्मचारीहरूको सहभागिता रहेको थियो।
प्रजिअ पौडेलले सम्पूर्ण राष्ट्रसेवक कर्मचारीलाई नयाँ वर्षको शुभकामना दिँदै नयाँ उत्साह र ऊर्जाका साथ नागरिकमुखी सेवा प्रवाहमा समर्पित हुन कर्मचारीलाई आग्रह गरे । त्यस्तै कर्मचारी मिलन केन्द्र रामेछापद्वारा प्रकाशित भित्ते पात्रो र लेखा समूह रामेछापद्वारा प्रकाशित २०८२ सालको टेबुल पात्रो सार्वजनिक गर्दै प्रजिअ पौडेलले भित्ते पात्रोमा जिल्लाका स्थानीय तह, संघीय र प्रदेश मातहतका जिल्लाका सरकारी कार्यालयको प्रमुख र उनीहरूको सम्पर्क नम्बर सहितको विवरण समेत उल्लेख भएको र त्यस्ता विवरणहरूले सरकारी कार्यालयबिच समन्वय र सहकार्यमा थप सहजता आउने विश्वास व्यक्त गरे।
कार्यक्रममा बोल्दै कर्मचारी मिलन केन्द्र रामेछापका उपाध्यक्ष दीपक कुमार श्रेष्ठले नयाँ वर्ष २०८२ लाई कर्मचारीहरूबिचको आपसी सम्बन्ध सुदृढ बनाउने वर्षको रूपमा लिनुपर्ने धारणा राखे । लेखा समूह रामेछापको अध्यक्ष समेत रहेका श्रेष्ठले कर्मचारी मिलन केन्द्रले यस किसिमका कार्यक्रममार्फत सेवामा कार्यरत कर्मचारीहरूबिचको आत्मीयता र समझदारी अभिवृद्धि गर्ने लक्ष्य लिएको बताए।
कर्मचारी मिलन केन्द्र रामेछापका सचिव अमर गिरीका अनुसार शुभकामना आदानप्रदान तथा भित्ते पात्रो सार्वजनिक कार्यक्रममा सहभागी भएका कार्यालय प्रमुख र कर्मचारीहरूले एक अर्कालाई फुलको गुच्छा दिँदै शुभकामना साटासाट गरेका थिए।
