रामेछाप– नेपाल विद्युत प्राधिकरणका कार्यकारी निर्देशक कुलमान घिसिङलाई पदबाट हटाउने सरकारको निर्णयप्रति नेपाली कांग्रेसका दुई महामन्त्री गगनकुमार थापा र विश्व प्रकाश शर्माले कडा असन्तुष्टि जनाएका छन् ।
महामन्त्री थापाले सामाजिक सञ्जालमार्फत सरकारको निर्णयप्रति गम्भीर असहमति जनाउँदै सरकार स्वयंले असन्तुष्टिको आगोमा मट्टितेल हाल्ने काम गरेको टिप्पणी गरे । उनले लेखेका छन्, “हामीले यस्तो नगरौँ है भन्दा सुनेको जस्तो पनि गर्ने तर निर्णय फेरि यस्तो गलत गर्ने? मन्त्रीहरूले बाटो बिराउँदा प्रधानमन्त्रीले समाल्नु पर्ने हो, तर विडम्बना त्यो भएन । निर्णय गलत छ, सरकार! उल्टो बाटो हिँडेर सही गन्तव्य पुगिँदैन ।”
त्यस्तै, अर्का महामन्त्री शर्मा पनि सरकारको निर्णयप्रति असन्तुष्ट देखिएका छन् । उनले लेखेका छन्, “कुलमान घिसिङलाई पदबाट हटाउन कांग्रेस पदाधिकारी तहको सहमति थिएन। बाँकी पदावधि काम गर्न दिन र नहटाउन आन्तरिक तथा सार्वजनिक रूपमा सजग गराइएको थियो।”
उनका अनुसार सरकारले कारबाही गर्नैपर्ने कुनै कारण देखेपछि पनि त्यसका लागि उचित प्रक्रिया अपनाउन सकिन्थ्यो । तर, सरकारको निर्णयले राम्रा प्रयासलाई छायाँमा पार्न खोजेको उनले आरोप लगाए ।
कुलमान घिसिङलाई हटाउने निर्णयप्रति सर्वसाधारणदेखि विभिन्न राजनीतिक दलसम्मबाट विरोध भइरहेको छ। विशेषगरी, लोडसेडिङ अन्त्य गर्दै नेपालको ऊर्जा क्षेत्रमा सुधार ल्याएका घिसिङको नेतृत्व कायमै राखिनुपर्ने माग उठिरहेको थियो।
सोमबार साँझ बसेको मन्त्रिपरिषद्को बैठकले कुलमानलाई हटाउदै हितेन्द्र देव साक्यलाई नियुक्ती गर्ने निर्णय गरेको थियो।
