रामेछाप- भूमि समस्या समाधान आयोग रामेछापले पूर्णता पाएको छ । गौतम लामाको अध्यक्षतामा गठित जिल्ला समितिमा एक विज्ञ सहित तीन जना सदस्यको नियुक्तिसँगै भूमि समस्या समाधान आयोग जिल्ला समिति रामेछापले पूर्णता पाएको हो । भूमि व्यवस्था, सहकारी तथा गरिबी निवारण मन्त्रालयले अध्यक्षमा गौतम लामा, विज्ञ सदस्यमा मिलन कुमार घिसिङ र सदस्यमा गंगादेवी कार्कीलाई यस अघि नै नियुक्ति गरेको थियो । त्यस्तै बाँकी एक सदस्यमा मन्त्रालयले बुधवार उर्मिला कार्की बस्नेतलाई नियुक्ति गरेसँगै जिल्ला समितिले पूर्णता पाएको हो ।
भूमिहीन दलित, भूमिहीन सुकुम्बासी र अव्यवस्थित बसोबासको आवास तथा भूमिमाथिको पहुँच र स्वामित्व स्थापित गराई देशबाट भूमिहीनताको अन्त्य, भूमिको महत्तम उपयोग र जनमुखी एवं न्यायपूर्ण भूमि व्यवस्था स्थापित गर्न योगदान गर्ने उद्देश्यका साथ गठित जिल्ला समिति रामेछापले रामेछापको समस्यालाई केन्द्रमा राखेर काम भइरहेको अध्यक्ष लामाले बताए ।
अध्यक्ष लामा यस अघि पनि अध्यक्ष बनेका थिए । उनको समितिले यस अघि पनि उद्देश्य अनुसारको धेरै काम गरेको बताउँदै यो कार्यकालमा पनि भूमि सम्बन्धी समस्या समाधानमा लाग्ने प्रतिबद्धता जनाए ।
आफ्नो प्रतिकृया दिनुहोस्