सुनापति– सुनापति गाउँपालिकाले ११५औँ अन्तर्राष्ट्रिय महिला दिवसको अवसरमा गाउँपालिकाभरिका ५० जना सफल महिला उद्यमीलाई सम्मान गरेको छ। गाउँपालिकाले विभिन्न उद्यमशीलता क्षेत्रमा सक्रिय महिलाहरूलाई प्रोत्साहन गर्दै उनीहरूको योगदानलाई कदर गर्न सम्मान प्रदान गरेको हो।
गाउँपालिकाभित्र रहेका महिलाहरू कृषि, पशुपालन, माहुरी पालन, गलैंचा बुनाइ, हस्तकला, तथा घरेलु उद्योगहरू सञ्चालन गर्दै आएका छन्। यस्ता उद्यमले गाउँमै रोजगारी सिर्जना गर्नुका साथै स्थानीय उत्पादनलाई प्रवर्द्धन गर्ने महत्वपूर्ण भूमिका खेलेका कारण, गाउँपालिकाले प्रत्यक वडाबाट १०/१० जना गरी ५० जना उत्कृष्ट महिला उद्यमीलाई छानेर सम्मान गरेको हो ।
गाउँपालिकाले महिला उद्यमीहरूलाई नगद पुरस्कारसहित सम्मान पत्र प्रदान गर्दै उनीहरूको परिश्रम र समर्पणको कदर गरेको छ। कार्यक्रमका प्रमुख अतिथि तथा संविधान सभा सदस्य धर्मशिला चापागाईं, गाउँपालिका अध्यक्ष ठुलोकान्छा तामाङ, उपाध्यक्ष गीता विष्ट, प्रमुख प्रशासकीय अधिकृत सुरेश कुमार श्रेष्ठ लगायतले सम्मानित महिलाहरूलाई खादा, अबिर तथा नगदसहित सम्मान पत्र प्रदान गरेका थिए।
कार्यक्रमका प्रमुख अतिथि चापागाईंले सम्मानित महिलाहरूलाई बधाई दिँदै गाउँपालिकाभित्रै स्वरोजगार बन्ने महिलाहरूको प्रयासलाई प्रशंसा गरिन्। उनले भनिन्, “महिलाहरू स्वरोजगार बन्न सकेमा समाजको आर्थिक समृद्धिमा ठूलो योगदान पुग्छ। आज यहाँ सम्मानित हुने महिलाहरू प्रेरणादायी हुनुहुन्छ। गाउँपालिकाले यस्ता कार्यक्रमलाई निरन्तरता दिनु आवश्यक छ।”
त्यस्तै, गाउँपालिका अध्यक्ष ठुलोकान्छा तामाङले पनि महिला उद्यमशीलतालाई प्रवर्द्धन गर्न गाउँपालिकाले आगामी दिनमा थप योजना ल्याउने प्रतिबद्धता व्यक्त गरे। उनले भने, “गाउँमै उद्योगधन्दा सञ्चालन गरेर महिलाहरू आर्थिक रूपमा आत्मनिर्भर बन्न सकून् भन्ने हाम्रो चाहना हो। यस्तो सम्मानले अन्य महिलाहरूलाई पनि प्रेरित गर्नेछ।”
उपाध्यक्ष गीता विष्टले महिलाहरूले आत्मनिर्भर बन्ने क्रममा भोग्नुपरेका कठिनाइहरूप्रति गाउँपालिकाले ध्यान दिने बताइन्। उनले भनिन्, “उद्योग व्यवसाय सञ्चालन गर्दा पूँजी, तालिम र बजारको अभाव हुन्छ। गाउँपालिकाले यस्ता समस्याहरू समाधान गर्न प्रयास गर्नेछ।”
उद्यमीहरुले आफ्नेै लगानी र गाउँपालिकाको समेत सहयोगमा सञ्चालन गरेका घरेलु तथा साना उद्योगहरू मार्फत महिलाहरू आयआर्जनमा सक्रिय बन्दै गएका छन् । बाख्रापालन, तरकारी खेती, मौरीपालन, ढाका कपडा बुनाइ, गलैंचा उत्पादन, होमस्टे व्यवसाय लगायतका क्षेत्रमा संलग्न महिलाहरूलाई विशेष रूपमा छनोट गरी सम्मान गरिएको हो।
सम्मानित महिलाहरूले पनि गाउँपालिकाले गरेको सम्मानप्रति खुसी व्यक्त गर्दै भविष्यमा आफ्नो व्यवसायलाई अझ विस्तार गर्ने प्रतिबद्धता जनाए। उनीहरूले आफ्ना उत्पादनहरूलाई राम्रो बजार व्यवस्थापन गर्ने अवसर पाएमा अझ ठूलो स्तरमा व्यवसाय सञ्चालन गर्न सकिने बताए।
सुनापति गाउँपालिकाले महिला सशक्तीकरणका लागि विभिन्न कार्यक्रमहरू सञ्चालन गर्दै आएको छ। यसअघि पनि गाउँपालिकाले महिलाहरूलाई उद्यमशीलता सम्बन्धी तालिम र व्यवसाय प्रवर्द्धनका लागि विभिन्न योजनाहरू सञ्चालन गरिसकेको छ।
यस प्रकारका सम्मान कार्यक्रमहरूले गाउँमा उद्यमशीलताको विकास गर्दै महिलाहरूलाई आत्मनिर्भर बनाउन महत्वपूर्ण योगदान दिने अपेक्षा गरिएको छ। गाउँपालिकाले आगामी वर्षहरूमा यस्ता कार्यक्रमहरूलाई थप व्यवस्थित बनाउँदै लैजाने योजना समेत रहेको प्रमुख प्रशासकीय अधिकृत सुरेश कुमार श्रेष्ठले बताए ।
