रामेछाप- रामेछापको सुनापति गाउँपालिकाले पालिकाको केन्द्रबाट प्रवाह हुने सेवालाई गाउँ केन्द्रित गरेर विभिन्न सेवा नागरिकको घर-आगनमै पुर्याएको छ । गाउँपालिकाले शुक्रवार देखि एकीकृत घुम्ती शिविर मार्फत पालिकाबाट प्रवाह हुने सेवालाई वडा कार्यालयमा लगेर स्थानीय नागरिकलाई सेवा दिन सुरु गरेको हो । अपाङ्गता भएका व्यक्तिलाई अपाङ्गता परिचय पत्र वितरण, जेष्ठ नागरिकलाई जेष्ठ नागरिक परिचय पत्र वितरण, व्यवसाय दर्ता तथा नवीकरण, योजना तथा कार्यक्रम सम्झौता, उपभोक्ता समितिलाई अभिमुखीकरण लगायतका सेवा दिने गरी शुक्रवार देखि सुरु भएको शिविरमा सेवा लिन आएका जेष्ठ नागरिकलाई गाउँपालिका अध्यक्ष ठुलोकान्छा तामाङले जेष्ठ नागरिक परिचय पत्र वितरण गरेर सेवाको सुरुवात गरेका छन् ।
गाउँपालिकाको पाँच ओटै वडामा संचालन हुने घुम्ती शिविरको सुरुवात गर्दै गाउँपालिका अध्यक्ष तामाङले पालिका सम्म आउन नसक्ने अपाङ्गता भएका व्यक्ति र जेष्ठ नागरिकलाई वडाबाट सेवा दिँदा उनीहरूलाई गाउँपालिका सम्म आउनु पर्ने झन्झटबाट मुक्त हुने र आर्थिक रूपमा समेत भार नपर्ने हुँदा उनीहरूकै सहजताको लागि सेवा गाउँ–गाउँमा लगिएको बताए । अपाङ्गता भएका व्यक्ति र जेष्ठ नागरिकले परिचय पत्र पाएपछि राज्यबाट पाउने सुविधा समेत गाउँपालिकाले उपलब्ध गराउने अध्यक्ष तामाङले बताएका छन् ।
गाउँपालिका उपाध्यक्ष गीता विष्टले गाउँपालिकाका नागरिकले स्थानीय सरकारबाट पाउने सेवालाई थप नागरिकमैत्री बनाउनको लागि विभिन्न सेवा गाउँमा लगिएको बताइन् । यस अघिका वर्षहरूमा पनि गाउँपालिकाले प्रदान गर्ने विभिन्न सेवा गाउँमै लगेर प्रदान गरिएको र यो वर्ष पनि विभिन्न सेवा सहित गाउँमा सेवा लगिएको भनाइ राखिन् । यसरी गाउँमा सेवा लैजदा नागरिकले गाउँमा सरकार भएको अनुभूति गर्ने र सरकारले नागरिक प्रति गर्नु पर्ने दायित्व पनि पुरा हुने उनको भनाइ रहेको छ ।
गाउँमै गएर उपभोक्ता समिति गठन गर्ने र त्यो समितिलाई अभिमुखीकरण गराउँदा आर्थिक वर्षका लागि विनियोजित योजनाहरू चाँडै सम्पन्न हुने र समिति मार्फत काम गर्दा पुरा गर्नु पर्ने कानुनी प्रक्रियाको बारेमा समेत समितिलाई जानकारी हुने भएकाले शिविर मार्फत समिति गठन गरेर अभिमुखीकरण गर्न लागिएको उपाध्यक्ष विष्टको भनाइ रहेको छ । त्यस्तै गाउँपालिका भित्र विभिन्न व्यवसाय गर्दै आएका तर हाल सम्म दर्ता नभएका र दर्ता भएर पनि नवीकरण नभएको व्यवसायलाई शिविर मार्फत दर्ता तथा नवीकरण गर्दा व्यवसायीलाई पालिका सम्म पुग्नु पर्ने झन्झटबाट मुक्ता हुनुको साथै कानुनी रूपमा सहज हुने उपाध्यक्ष विष्टले बताइन् ।
शुक्रवार वडा नं ४ बेथानबाट सुरु भएको शिविर शनिवार वडा नं ५ खनियापानी, आइतबार वडा नं ३ हिलेदेवी, सोमवार वडा नं २ दिमीपोखरी र मंगलवार वडा नं ५ गुन्सीमा संचालन हुने गाउँपालिकाका प्रमुख प्रशासकीय अधिकृत सुरेश कुमार श्रेष्ठले बताए । प्रमुख प्रशासकीय अधिकृत श्रेष्ठले शिविरमा सहभागी भएर सेवा लिन गाउँपालिकाका नागरिकहरूलाई अनुरोध गरेका छन् ।
