रामेछाप- रामेछापको सदरमुकाम मन्थलीमा आयोजना भएको एक दिने विज्ञान शैक्षिक सामाग्री प्रर्दशनी सम्पन्न भएको छ। यो वर्षको शैक्षिक कार्यक्रम अन्तरगत मन्थली नगरपालिकाले विज्ञान शैक्षिक सामाग्री प्रर्दशनी आयोजना गरेको थियो। मंसिर २गते आइतबार मन्थली माध्यमिक विद्यालयको प्राङ्गणमा भएको विज्ञान शैक्षिक सामाग्री प्रर्दशनीमा मन्थली नगरपालिकाका १९ वटा विद्यालयहरूले भाग लिएका थिए । जसमा मन्थली मावि पहिलो, लिट्टिल स्टार बोर्डिङ स्कुल दोस्रो, तामाकाेशी बाेर्डिङ स्कुल तेस्रो र भीमेश्वर रुद्र मावि चिसापानी चौथो भएका थिए । पहिलो हुनेले नगद दश हजार, दोस्रोले नगद सात हजार पाँच सय, तेस्रो हुनेले पाँच हजार र चौथो हुनेले नगद तीन हजार प्राप्त गरेका थिए । विजेता र सहभागी सबै विद्यालयहरूलाई प्रमाणपत्र प्रदान गरिएको थियो । नगद पुरस्कार र प्रमाणपत्र मन्थली माध्यमिक विद्यालय व्यवस्थापन समितिका अध्यक्ष तेज प्रसाद सुवेदी, नागकन्या माविका प्रधानाध्यापक सुमित्रा खड्का, मन्थली माविका सहायक प्रधानाध्यापक चन्द्र सिंह धामीले संयुक्तरूपमा प्रदान गरेका थिए ।
कार्यक्रममा बोल्दै मन्थली नगरपालिका शिक्षा शाखा प्रमुख विष्णु बहादुर अधिकारीले विज्ञान प्रर्दशनीले विद्यार्थीको क्षमता थप बढ्ने बताए । उनले आगामी दिनमा विज्ञान शिक्षालाई अध्यापन गराउन सहयाेग पुग्ने थप कार्यक्रम बनाउने बताए। यस्तो कार्यक्रमले विद्यार्थीहरूलाई विज्ञान प्रविधिकाे क्षेत्रमा नयाँ खाेज र अनुसन्धान गर्न सहयोग पुग्ने लिट्टिल स्टार माविका प्रधानाध्यापक रमेश फुयालकाे भनाइ छ । उनले मन्थली नगरपालिकाले विज्ञान शिक्षामा खाेज अनुसन्धानका लागि यथोचित बजेट राख्नुपर्ने सुझाव दिए ।
प्रर्दशनीकाे मन्थली नगरपालिका उपप्रमुख ईश्वरी बस्नेत, प्रमुख प्रशासकीय अधिकृत देवर्षि सापकोटा, शिक्षा विकास तथा समन्वय इकाई रामेछापका प्रमुख नेत्र प्रसाद गजुरेल, मन्थली नगरपालिका महाशाखा प्रमुख उपसचिव हेमन्त कुमार, बुढाथोकी मन्थली नगरपालिका प्रवक्ता गाेपाल श्रेष्ठ, नेल्टा रामेछापका अध्यक्ष हस्त बहादुर लामा लगाए नगरपालिकाका जनप्रतिनिधि, कर्मचारी, विभिन्न विद्यालयका प्रधानाध्यापक, शिक्षक, विद्यार्थीहरूले अवलोकन गरेका थिए ।
